بعد استخدامه لأيام.. عمرو أديب يكشف أبرز مشكلات طريق الساحل الشمالي

كشف الإعلامي عمرو أديب؛ عن أهم المشكلات التي يعاني منها طريق الساحل الشمالي بعد أن قام بتجربته واستخدامه بشكل شخصي خلال الأيام الماضي.

وقال أديب خلال برنامج "الحكاية" المذاع على قناة "أم بي سي مصر": "ملاحظاتي والأشياء اللي أنا شفتها والأشياء اللي بقترحها كمواطن بيستعمل الطريق؛ أنا شفت أكبر انتشار أمنى مروري على الطريق لدرجة أن الكباري المدورة كان فيها عربيات شرطة".

وأضاف: "كانوا واقفين 24 ساعة وأنا شفت العيد دة أكبر انتشار أمنى شرطي على طريق؛ نمرة اتنين الطريق بتاع الوصلة اللي يودي على الطريق الساحلي لسة مخلصش وبيتم توسعته".

وتابع: "المشاكل فين ياولاد؟ كان كل كلامنا على الكباري؛ الكباري مش هي المشكلة؛ المشكلة أن انت ساعات تلاقي مطلع الكوبري شمال ولكن بعد يومين تلاته بتعرف أن بتطلع منين وتنزل منين".

وأوضح: "ممكن يحلوا مشكلة أن المطالع شمال؛ المشكلة فين؟ من تاني يوم العيد الجحافل اللي كانت موجودة في الساحل أعداد مذهلة؛ المشكلة الحقيقة في طريقي الخدمة اللي هو رايح جاي".

وواصل: "أول ما يكون في زحام قدام أي قرية الطريق اتفقل؛ وأنت لا بتعرف ترجع ولا تطلع على الطريق السريع؛ المشكلة الحقيقة التي عانى منها الناس هو طريق الخدمات أو طريق القرى إنما الطريق السريع أنت في أمريكا".

وأكمل: "أنت بتتكلم عن 150 كم مسفلتين ومنورين؛ المشكلة الحقيقة في طريق القرى؛ القرى يجب أن تجدد من بواباتها وأن يكون في عمق؛ الطريق مازال تحت الانشاء ولم ينتهي بعد".

واختتم: "هل هيكون في طريق رايح بس وطريق جاي بس والدنيا تبقى واسعة معرفش؛ بشكل عام الطريق معمول فيه مجهود غريب".