عمرو أديب عن قرار جمارك الموبايل: الدولة لما بتلوي الحياة مبتجبش النتائج المرجوة

انتقد الإعلامي عمرو أديب قرار وزارة المالية بإضافة الجمارك على الهواتف الواردة من الخارج بصحبة المواطنين.

وقال أديب خلال برنامج "الحكاية" المذاع على قناة "إم بي سي مصر": "سألت ناس من تجار الموبايل الكبار هل يا جماعة الناس بقت تشتري منكم أكتر من اللي بيشتروا من التهريب؟ اتضح أن لغاية دلوقتي الناس بتشتري الموبايل المهرب ويدفعوا عليه الـ 38.5% عشان بس الدولة لما بتقرر تلوي الحياة وتعمل أشياء ليست موجودة في الواقع مبتجبش النتائج المرجوة".

وأضاف: "حتى الآن يشتري المواطن المصري الموبايل المهرب سواء كان داخل بيه من برة أو من الداخل والحكاية أنك أضفت شرعية على الموبايل المهرب ولغاية دلوقتي موبايل الداخل أرخص من الخارج".

وتابع: "الإجراءات الحكومية اللي اتعملت مراعتش أشياء كثيرة مخدوش بالهم أن الموبايل فيه سعة مختلفة وأنا حتى الآن بقول إن التهريب أرخص، وأنا مش بشجع التهريب أنا بستخدم التعبير اللي قالته الدولة وأنا عندي ليكم خبر أن هذه الإجراءات لم تؤدي إلى أن الأمر يتم انضباطه".

وأكمل: "الكام يوم اللي فاتوا على العكس التهريب زاد، أنا خلاص هجيبه كنت بعملي في الموبايل 30 ألف جنيه خلاص هعمل 15 وبيهربوا وأكتر من الأول لأنه أرخص ولأنك لم تتخذ الإجراءات بطريقة حكيمة، ولم تتخذ إجراءاتك بطريقة تضمن أن الناس متفضلش تلعب معاك".

وأوضح: "لما تيجي تقولي أرخص 15 ألف جنيه هقولك إيه؟ في حقيقة الأمر الناس هنا لو عنده 5 آلاف جنيه أقل في الموبايل طبعا دي مش مناداة أن أنت تزود الحاجة أنا بقولك أن الأشياء لما بتتعمل بطريقة غير اعتيادية وغير متداولة في العالم هييجي بردو في النهاية يبقى عندك مشكلة".

وذكر: "أنا جبت الموبايل من برة وفي مشاكل هروح بيه التوكيل والا مش هروح أنت جيت قلتلي الموبايل اللي جاي من برة تدفع عليه إيه المهم؟ وجيت أنا بعد أسبوع اتنين تلاتة في خطأ فني أصلحه فين؟".

واختتم: "جمع الأموال له أصول وقعدنا نسأل ياجماعة هو الموضوع ده هيجيب لكم كام يعني؟ ألقى الأرقام اللي جاية دخل لخزينة الدولة اليومين اللي فاتوا دول 200 موبايل، هو ده يعني؟ قالك حطينا 350 مفتش جمارك دا مرتباتهم قد المبلغ اللي هتجيبه".