عمرو أديب للحكومة: هو كل حاجة هات؟ أنا هجيب منين وأنت هتشتغل امتى؟
عبر الإعلامي عمرو أديب عن استيائه من تركيبة الرسوم المفروضة حديثا على الهواتف الواردة من الخارج، مشيرا إلى وجود كثير من التعقيدات في هذا القرار.
وقال أديب خلال برنامج "الحكاية" المذاع على قناة "إم بي سي مصر": "الـ 38% بتاعة الموبايل مش كلها ضريبة فيها جواها حاجة اسمها تنمية موارد الدولة أنت بتدفعني كمستهلك تنمية موارد الدولة، وفي جزء لجهاز تنظيم الاتصالات طيب هو الجهاز عملي إيه لما اشتريت الموبايل من برة إيه اللعبكة دي؟ ايه كمية الأشياء المعقدة دي؟".
وأضاف: "في النهاية أنا عايز المواطن يعيش بقى مش سهلة ولا بتاع هو مفيش حاجة بتنزل كله هات مفيش خد؟ قانون جديد كل شوية من يومين العربيات مش عارف إيه طيب هجيب منين؟ أنت ناوي تشتغل إمتى؟ أنا هجيب منين؟".
وتابع: "أنا أجيب منين كل ده اللي هو هناك عشرة وهنا خمسة وهنا ستة وهنا سبعة، أنا مش واقف عند طبقة بعينها أنا واقف عند الطبقة اللي انزلقت اللي كان بيودي عيالة مدرسة تجريبية أو لغات وبعدين نقلهم مدرسة حكومي مفيش أسوأ من الانزلاق الطبقي أن أنت فجأة بدل ما تاكل لحمة مرتين في الأسبوع تاكل مرة".
وواصل: "الغرفة التجارية بتقول وصول 80% من الياميش إلى المخازن طيب هو قد إيه من دول مهرب؟ وهي البلد لسة عايزه ياميش؟ هتقولي دا للسياحة يعني نوقف الكنافة والقطايف؟ وقفوا التهريب الصناعة الوطنية بتتبهدل".
وأوضح: "لازم يكون في جهة في البلد عندها نوع من أنواع الضبط والربط في التهريب، إنتوا جايين على سلعة؟ سيبك من ده خد كل حاجة تانية لو جادين ماشي متجيش بقى تقولي العشرة جنيه اللي على الكاڤر بتاع السيم كارد طيب والعشرة ملايين التانيين إيه؟ حافظوا على القدرة الشرائية للمواطن، المواطن مش لازم يصل أبدا لمرحلة عدم القدرة الشديدة؟".
