تعليق ناري من عمرو أديب على وفاة الطيار أشرف أبو اليسر

علق الإعلامي عمرو أديب؛ على وفاة الطيار أشرف أبو اليسر والذي تسبب الممثل محمد رمضان في فصله من عمله بعد أن نشر صورة له داخل قمرة القيادة خلال إحدى الرحلات.

وقال أديب خلال برنامج "الحكاية" المذاع عبر منصة "شاهد": "النهاردة توفي الكابتن أشرف أبو اليسر وهو الطيار اللي رفع القضية على محمد رمضان؛ وفاة الطيار تسببت في ردود فعل عنيفة على وسائل التواصل".

وأضاف: "كنت أعرف الطيار وركبت معاه مرة؛ كان راجل محترم وكان أستاذ في الكلية الجوية ورفع قضية على محمد رمضان بعد ما اتفصل من شغله عام 2020".

وتابع: "عايز أقول لمحمد رمضان يا محمد أن لازم ضميرك يكون مستريح مش لازم تكون مضايق خالص مش عارف الناس عايزه منك ايه انت كنت بتاخد بالك منه على طول وبتطبطب عليه ولما اتنقل المستشفى كنت بتسال عليه لما عرفت أنه اتقهر واتبهدل زي ما سالت على الشاب الي فرقعت فيه القنبلة في الإعلان".

وواصل: "مش عايز ضميرك يأنبك دانت جدع وصاحب صاحبك النهاردة في الأيام المبروكة خدت دعوات يابني ربنا يجعلها من نصيبك الناس كلها لما قامت الصبح وشافت الخبر رفعت ايدها للسماء وقالت يارب محمد رمضان هتشوف دعا الناس لأنك راجل جدع".

وأكمل: "اكيد بتبص حواليك وبتسال نجاحك السنادي ضخم يابني اكيد قاعد بتفكر انا بيجرالي كدة ليه عشان الخير اللي بتعمله؛ ربنا بيجازيك على اللي بتعمله".

واختتم: "ربنا هداك لحاجة عظيمة وعايز تعمل الواجب؛ رحت منزل صورة للطيار متصور مع عمرو دياب واللي حطوا الصورة أكيد الناس الوحشة اللي شغالة معاك وبعدين رحت ساحب الصورة وحاطط صورة سودة عايز أقلك ربنا مش هيسبك لان اللي انت عملته الخير اللي عملته للطيار والشاب اللي انفجرت فيه القنبلة واستفزيت الشعب؛ قلت نسيء للطيار وهو ميت ان شاء الله ابقي قابلني انت نسيت مشهد الطيار وهو على فراش الموت".