أعمال السنة والتقييمات الأسبوعية.. أبرز ملاحظات "أمهات مصر" ببداية الدراسة

"طمنونا عليكم بعد الأسبوع الأول للدراسة.. وهل ليكم أي ملاحظات؟"، بهذه الكلمات وجهت عبير أحمد مؤسس اتحاد أمهات مصر للنهوض بالتعليم، وائتلاف أولياء الأمور، حديثها مع أولياء الأمور لمتابعتهم بعد مرور أسبوع علي بداية العام الدراسي.

وتفاعل العشرات من أولياء الأمور على جروب اتحاد أمهات مصر للنهوض بالتعليم، وائتلاف أولياء الأمور، حيث قالت ولي أمر:"ياريت الوزارة تكتفي بامتحانات الشهرية فقط لا داعي امتحانات الأسبوعية لأنها مجهدة للمدرسين والطلبة وتعطيل للوقت والمناهج فعلا كبيرة محتاجة وقت كافي للدراسة في المدارس وفي المنزل رجاء إعادة النظر في التقييمات الأسبوعية".

وأضافت ولي أمر أخرى: "التقييم الأسبوعي ضغط وعبء علينا وكفاية الامتحان الشهري والواجب اليومي خصوصا أن اليوم بقى طويل والأولاد بيرجعوا مجهدين جدا وللأسف بياثر على المذاكرة".

وقالت ولي أمر: "عجز المدرسين في المدارس الاولاد يأخدوا بالكثير 3  حصص، واليوم الدراسي طويل وبعض المدرسين بيستغلوا درجات اعمال السنة وخصوصا في المدارس الحكومية حدث ولا حرج".

وتابعت أخرى: "الإلتزام والحضور حاجه كنا افتقدناها والطلبه كانوا نسيوا يعنى ايه مدرسه، مبسوطه من الانضباط الموجود حاليا"، وعلقت أخري: "موضوع أعمال السنة اللى فى ايد المدرس دة بجد عذاب وللأسف بعض المعلمين بيستغلوا ده، ياريت يكون في رقابة ومتابعة مت الوزارة علي المعلمين وخاصة فيما يخص أعمال السنة".

وأوضحت ولي أمر أخري: "ياريت الاهتمام بالمرحلة الثانوية بالمدارس وخاصة أولي وتانية ثانوي، حصص أحتياطي ونقص كبير في المعلمين"،   وتابعت أخري: " الحقيقه الوقت طويل اوى طلاب الصف الثاني الثانوي واجهاد عليهم مفيش وقت يذاكروا مفرهدين حرفيا..ولا داعى لتقييم اسبوعى مجهد ممكن التقييم شهرى ياريت نعيد النظر فى النقطه دى،أيضا الوقت عنصر الوقت الرجوع من المدرسه وراها الدروس، إجهاد وضغط علي الطالب، نرجو الأهتمام بتنظيم الوقت ومواعيد الحصص عاوزين فرص الولاد تتنفس علشان نخفف الحمل عنهم ويزيد إستيعابهم بالإضافة للتقييم يكون شهرى هيكون أفضل كتير لو سمحتم".