مصطفى بكري: يا رئيس الوزراء لا تشمت أحدا فينا.. واختر وزراءك بعناية
طالب الإعلامي مصطفى بكري، رئيس الوزراء المكلف الدكتور مصطفى مدبولي باختيار الوزراء بعد دراسة وافية وعدم ضم أسماء قد تصيب الناس بالإحباط.
وقال بكري، خلال برنامج "حقائق وأسرار": "آه الشعب المصري زعلان وغضبان كمان من حاجات كتير في البلد بس الشعب ده عمره ما يفرط في بلده، الشعب اللي خرج للرئيس عبد الفتاح السيسي في 2023 وقاله استكمل مشروعك الوطني هو الشعب اللي منتظر من الرئيس السيسي تغييرًا جذريًا في كل مجالات الحياة".
وأضاف: "إحنا في أوضاع مترهلة لازم تمشي ومستنيين التغيير الوزاري، اوعوا تحبطونا وتجبولنا ناس ربنا يسهلهم، كان في اعتراضات كتيرة على السيد رئيس الوزراء، وهو عارف كويس أوي، ولكن ثقة القيادة السياسية فيه ماشي، بس يا رئيس الوزراء يا دكتور مصطفى ادرس أي مشروع قبل ما تتكلم فيه، والنبي متخدش قرارات ثم القيادة السياسية تدخل فيها متزيدوش احتقان البلد وراعوا الناس الغلابة وحركوا المحافظين في المحافظات".
وتابع: "إحنا عايزين البلد بتاعتنا منشمتش حد فينا فوقوا شوية، عايزين الوزراء تنزل وتشوف، شوف الصناعة وقطاع الأعمال، ولما صوتنا اتنبح لهشام توفيق اللي قدمتوه للرئيس خرب لكم الدنيا من أولها وقفل مصانع وقدم تقارير كاذبة وبقى يشوف وبعد كده الأجهزة الرقابية البلاوي اللي حصلت، شركة تشييد واللي حصل في المحلة ولا حاجة اتنفذت كله بالعكس، وصمم على ضرب مصنع الحديد والصلب والكوك وغيره".
وأوضح: "كانوا بيقولوا عليه دا أفضل وزير، ولما طلع بقى مفيش حاجة عجباه، وبقي يخبط في كل حاجة، ما تسمعوا رأي الناس ما تسمعي يا حكومة رأي الناس مالناس بتصرخ في مجلس النواب ومحدش بيسمع صوتها".
وذكر: "ما تيجي كل يوم والتاني يا رئيس الحكومة مجلس النواب ونتكلم ومحدش بيتجاوز، وأنت موضع احترام بس بنختلف في السياسات والمواقف".
