عمرو أديب: افتتاح موسم الحصاد اليوم لفت نظرنا إلى أشياء أخرى

أكد الإعلامي عمرو أديب، أن افتتاح الرئيس عبد الفتاح السيسي اليوم لموسم الحصاد منح الجميع فرصة للنظر في أشياء أخرى بعد انشغاله طوال الفترة الماضية بارتفاع الأسعار.

الأسعار

وقال، أديب خلال برنامج "الحكاية" المذاع على قناة "إم بي سي مصر": "نظرنا الاقتصادي كان منصب على الأسعار ومكناش بنبص لحاجة تانية ودا طبيعي أنه حياة الإنسان اليومية تشغل باله، المواطن المصري زي الأمريكي زي الفرنسي، لتر البنزين في أمريكا يزيد تلقى المحطات بتتكلم عن الموضوع دا شيء طبيعي".

وأضاف: "اللي حصل النهاردة ادالنا فرصة تاني إن أنت تتأمل أشياء أخرى، لما تقعد تشوف إزاي بننقل ماية الري من مكان لمكان ويطلع وزير الري يقول كنا بننقل الماية من تحت قناة السويس القديمة والجديدة وأنك تنقل ماية من الضفة دي للضفة دي تحت القناة".

وتابع: "إحنا معندناش مطر فعايزين ماية، الماية دي بتيجي منين؟، الرئيس يتحدث اليوم عن أراضي تزرع تساوي حجم 3 محافظات كبيرة منها البحيرة اللي من أكبر محافظات مصر فيها أرض زراعية، النهاردة بيتكلموا إنهم قدروا يوصلوا لجني قصب السكر بشكل آلي وأهم شيء الصوامع كان بيكون عندك هدر كبير، والرئيس بيقول سعر الصومعة بييجي خلال 3-4 سنين من توفير الهدر".

إنجازات

وواصل: "بيكون عندك فرصة إنك تبص تشوف إيه اللي بيحصل، الرئيس كان بيتكلم على كذا جدلية، الرئيس بيقول أنا عملت طريقين كل طريق 250 كم مش عشان نصيف في الساحل الشمالي، ولكن عشان الأرض على جانبي الطريق نقدر نوصل لها الحياة والقطاع الخاص مكانش هيعمل ده".

وأكمل: "القطاع الخاص عايز أرض قريبة من الماية والطريق ومرفقة، هل القطاع الخاص كان يقدر يعمل الكلام ده، ممكن حد من القطاع يقولك طيب ما ترفق وأنا آجي أشتغل والرئيس قال بردو النهاردة تعالى اشتغل، أنا زرت أمريكا وزرت كل الأماكن اللي بتزرع القمح وكل الحقول دي كانت تبع القطاع خاص لكن في مطرة وماية وفي دعم من الدولة".

واختتم: "الدولة قالت أنا هدخل أشتغل الشغلانة دي، وهي شغلانة صعبة، الرئيس قال كلمة واضحة، أنا بقولكم إحنا صرفنا قد إيه، كان الرئيس بيقول للمسؤول قول إحنا صرفنا كام عشان الناس تعرف الفلوس اتصرفت ليه وفين".