عمرو أديب يطالب بتدقيق أرقام اللاجئين: "الجهات الدولية مش معترفة بـ9 ملايين"

طالب الإعلامي عمرو أديب، بتدقيق رقم اللاجئين الموجودين في مصر، مشيرًا إلى أن الحصر الذي تتحدث عنه الحكومة بوجود 9 ملايين لاجئ كبير للغاية.

أزمة اللاجئين

وقال أديب، خلال برنامج "الحكاية" المذاع على قناة "إم بي سي مصر": "لماذا لا تظهر أرقام اللاجئين الموجودين في مصر في المنظمات العالمية؟ لما أسأل في كام لاجئ في مصر هو الأرقام عندكم في كام لاجئ؟ يرد ويقولك الأرقام ما بين 500-600 ألف".

وأضاف: "رئيس الوزراء وأنا مبقولش إنه صح أو غلط لما بيتكلم عن 9 ملايين لاجئ في مصر دا معناه إيه، الرقم ده خلى المصريين يقولوا أنت بتصرف 10 مليارات على اللاجئين وتقطع علينا النور عشان مليار دولار؟".

وتابع: "أرجو التدقيق في المسألة لأن في فرق بين الأجانب واللاجئين، أنا قعدت في دبي سنتين هل أنا لاجئ؟ في المملكة العربية السعودية في 2 مليون مصري بيشتغلوا هل دول لاجئين؟ أنا عايز المسألة دي مرة، ويتم الانضباط فيها".

وواصل: "الباقي دول الأجانب المفروض لو هو مش لاجئ هو قاعد واكل شارب نايم صارف شغال، لما تتوجه للعالم وتقوله عندي 9 ملايين لاجئ هو ميعرفش الكلام ده، أردوغان راح للاتحاد الأوروبي قالهم أنا عندي 2.5 مليون سوري نزحوا من سوريا، أنا عايز فلوس أو هنقلهم أو أرجعهم أنا مقدرش أصرف عليهم وبالفعل وصل أردوغان على تفاهمات أنه يقدر يستوعب الناس دي".

أزمة اقتصادية

وأوضح: "إحنا معندناش أي جهة دولية معترفة بعدد اللاجئين ده، الرقم الرسمي اللي بيتقال 500 ألف أنا هقول في 2 ملايين لاجئ طيب السبعة مليون دول إيه؟ أجانب أو زوار أو مهاجرين، أنا اشك إن في حد عنده إجابة السؤال ده".

وأوضح: "إحنا عايزين نفهم قولي إن عندي فعلا 9 ملايين لاجئ لأن ده رقم مش موجود عند حد، الكلمات لازم يتحط لها تعريف من هو اللاجئ أو المهاجر أو المقيم، في ناس مش مظبطة أوضاعها والله دا لاجئ ولا مقيم ولا مقيم غير شرعي".

واختتم: "المصريين ابتدوا يتكلموا لأن في أزمة اقتصادية، لو الراجل ده مقيم معاه أولاده وقاعد بيدفع الرسوم بتاعته كراجل مقيم في مصر، دا زيه زي أي مواطن عايش في أمريكا أو بريطانيا أو باريس وأنت لست لاجئ إنما اللاجئ زي مين؟ زي مثلًا الحرب في أوكرانيا".