خالد يوسف عن نقد طارق الشناوي: "هتقل أدبك.. هقل أدبي"
أكد المخرج خالد يوسف، أن الناقد الفني طارق الشناوي أساء إليه من خلال أحد مقالاته، مشيرا إلى أنه قام بالرد عليه بنفس الأسلوب.
وقال يوسف خلال برنامج "حبر سري" المذاع على قناة "القاهرة والناس": "مكنتش أتمنى أقول كدة على طارق؛ ولكن هو اللي اضطرني؛ أنا عمري ما رديت على ناقد في حياتي كلها؛ وهاتولي تصريح واحد أن فلان نقد فيلمي أو قال انه وحش وطلعت رديت عليه؛ أنا بقول إن تنتفي صلتي بالعمل وقت ما سلمت نسخة العمل وبقى ملك الجمهور والنقاد يعملوا فيه ما يشاء".
وأضاف: "أنا بقول ويلي من نار الكلمة إن لم تجد من يسمعها أو يصفعها؛ دا المستهدف بالفن احداث التأثر والتأثير؛ مكنتش أتمنى أقول على طارق كدة أنا مقلتش أي حاجة عن اللي كتبه انا قلت على العنوان اللي اختاره".
وتابع: "لما يقول خالد يوسف بيتشعبط على أسامة أنور عكاشة لا أقوله فشر أنت اللي بتتشعيط عليا لأن انا خريج مدرسة كبرى اسمها مدرسة يوسف شاهين ومتشعبطش عليه؛ انتجلي فيلم واحد في حياتي كلها وبعدها انطلقت في السوق وعملت جواز بقرار جمهوري واشتغلت مع محمد حسن رمزي وممدوح الليثي وكامل أبو علي".
وواصل: "لما حد يختار عنوان مسيء زي دا يبقي برة النقد؛ أنت بتقل ادبك فأنا هقل أدبي؛ متقلش أدبك عليا قول العمل فاشل قول أنت أفشل مخرج قول كل ما شئت وأنا لو رديت عليه يبقي مبفهمش يعني ايه نقد ولكن لو تقول أنت بتتشعبط على أسامة أنور عكاشة لا أنا هرد عليك وأقولك أنت بتتشعبط على اسمي؛ انت مقالتك كلها لو أنا معلقتش عليها مكانش حد هيسمع عنها".
وأكمل: "أنا دخلت على الهوا وقالولي مداخلة ومقالوليش أن طارق موجود على الهواء فاضطريت أرد؛ أنا ادبست في المداخلة ولقيته قدامي ولو أنا أتكلمت بشكل لطيف يبقي انا مبحترمش اللي أنا عملته؛ لا أنا بحترم اللي عملته كويس اوي ولما حد ينقد العمل معندوش علاقة بقي أنا بتشعبط هو دة نقد؟ ايه علاقة ده بالنقد؟".
واختتم: "أنا قلتله لا يا حبيبي اللي أنت كاتبه ده مش نقد دي انطباعات صحفية ليست لها علاقة بالنقد الفني؛ أنا قد كلامي ومش هتراجع عنه ولما هو يتكلم كده أنا هتكلم كده".
