مصطفى كامل: "اتعمل في حلمي بكر اللي ميخطرش على بال"

أكد الفنان مصطفى كامل، نقيب المهن الموسيقية، أن الموسيقار الراحل حلمي بكر كان يتعرض إلى معاملة سيئة في أواخر حياته، معقبا: “أن ما تعرض له لم يكن طبيعيا”.

وقال كامل خلال برنامج "العرافة" المذاع على قناة "النهار": "لم أسعى للوصول لهشام نجل الراحل حلمي بكر؛ هو اللي دور عليا؛ كنت واخد عهد على نفسي أنني مش هتدخل في موضوع أستاذ حلمي لأني تعبت من الزج باسمي ومن اندفاعي بسبب حبي ليه وبعدين هو يرجع يتهاون في حق نفسه ويطلبني اتدخل تاني وتالت وخامس".

وأضاف: "أنا كنت بحب راجل بيحبني مش موضوع الاستاذية خالص ولا عشان أنه استاذي؛ أنا من فترة كبيرة خدت عهد أن مليش دعوة بالموضوع ده، الفنانة نادية مصطفى كانت بتزور أستاذ حلمي وأنا كنت بقولها شوفيه عايز أيه".

وتابع: "في الأيام الأخيرة نادية كلمتني وبعتتلي رسائل صوتية قاتلة وهي فوق ما العقل يتخيل، الحقوا الأستاذ حلمي وكان بيتعمل فيه كل اللي يخطر على بال، ابن حلمي بكر موجود هنا في مصر ونادية مصطفى بعتتله كل حاجة".

وأكمل: "نادية مصطفى قالتلي ابن الموسيقار حلمي بكر عايز يكلمني وأنا قلتلها يكلمني ليه؟ أنا بتفرج زي جمهور المشاهدين الحقوا الأستاذ حلمي ومن ضمن الكلام زوجته قالت ابنه كان هنا ومسألش على أبوه فأنا استغربت ولما سألت هو ابنه كان هنا قالوا أيوه".

وذكر: "أنا معايا الرسائل وقالتي ابن حلمي بكر بيدور عليك وقلتلها ليه يا نادية عايزة تدمري حياتي وحياة ولادي وقلتلها هو عايز مني ايه؟ أنا كان ردي واضح اللي هو ايه مطلوب مني أنت كنت في مصر ومسألتش على والدك ليه؟".

وتوفي الموسيقار الراحل حلمي بكر عن عمر ناهز 86 عاما بعد مشوار طويل قدم خلاله أكثر من 1000 أغنية لأجيال متعاقبة من المغنيين المصريين والعرب.

وكانت الحالة الصحية لبكر قد تدهورت خلال الأشهر الثلاثة الماضية وتلقى الرعاية الطبية في أحد المستشفيات قبل أن يكمل العلاج بالمنزل.

وشهدت الأيام الأخيرة من حياة الموسيقار الراحل اتهامات لزوجته من جهة اشقائه ونجله بسوء معاملته والتسبب في تدهور حالته الصحية.