عمرو أديب: "الإجراءات الأمنية مش هتحل الوضع الاقتصادي"

أكد الإعلامي عمرو أديب؛ أن هناك تراجع في أرقام الصادرات المصرية نتيجة عدم استيراد المواد الخام بسبب أزمة الدولار.

وقال أديب خلال برنامج "الحكاية" المذاع على قناة "أم بي سي مصر": "ارقام التصدير بتقل لأن الراجل اللي بيصدر ده عايز المكون؛ وغير الخضار والفاكهة أي حاجة محتاجة مكون بالدولار؛ المسألة معقدة جدا ويجب ان يكون في حركة؛ ايه الحركة اللي اتعملت؟ وعندنا اتحدث عن حركة لا اتحدث عن دور أمني". 

وأضاف: "من أول ما عملت الأفعال غير الاقتصادية انت قررت أنك هتواجه الناس اللي بتتعامل بالدولار؛ الدولار اخباره ايه سعره ايه فين الناس بتاعه بينهار؟ النهاردة بكام نزل من 70 بقي بكام؟ لن يتغير الأمر والامر بالنسبالي المهم هو الأسعار".

وتابع: "النهاردة السكر بكام؟ اللوبيا بكام العدس بكام؟ النهاردة الفراخ بكام؟ وكيلو اللحمة بقي بكام؟ أنا مش عايز أقول الرقم أنا لما سمعت قلت ايه ده لحم غزلان؟ وبقت في جملة بتتقال عند كل المواطنين أنت مش شايف يا أستاذ عمرو؟".

وأكمل: "لن يتغير الامر غير باجراءات مش أمنية ولكن اقتصادية؛ من يوم ما ابتدينا نقول بينهار وبيترنح؛ دخل البلد دولار؟ أنا هنهار ازاي؟ وري البني ادم دولار داخل بجد وعن حق بأي طريقة؛ أصل في ناس بتقولك لا متبعش ورق أنا مش واقف عند التفاصيل؛ البيع اللي كنتوا بتشتموني عليه لا يحدث".

وأوضح: "احنا عدينا قطر البيع؛ تيجي تكلم المستثمر ياجماعة مخلصتش ليه؟ يقولك هو أنا عارف الدولار بكام؟ أما تعرفوا هو بكام؛ وأديها قاعدة ليه مبتتباعش؟ الإجابة مش معروفة؛ طيب في فلوس جاية من برة فين الصندوق؟ انتوا قلتولي من 10 أيام دا الصندوق داخل ومفيش؛ واضح أن الصندوق عنده مشكلة واضح جدا أننا مبنخلصش".

واختتم: "احنا بنتكلم على مصانع بتقف وناس بتوقف الشغل ودولار مبينزلش؛ دايما أقول هو أما ينزل يبقي بكام؟ لما يكون مرزوه في السبعين وينزل هو ده النزول؟ وزارة المالية بتكلمنا أن أي زيادة في سعر العملة بتأثر على الموازنة؛ انتوا عايزين تعدلوا الاقتصاد والا عايزين وزير المالية يطلع يقول عندنا فائض؛ هي حقيقة الامر ايه هتعمل اصلاح والا لا؟".