بعد خيري رمضان.. سيد علي يطالب بوقف العمرة: "اللي يعوزه البيت يحرم على الجامع"

طالب الإعلامي سيد علي بتأجيل سفر المصريين لأداء العمرة لعدة أشهر لحين تراجع حدة ازمة العملة الأجنبية التي تعاني منها البلاد.

وقال علي برنامج "حضرة المواطن" المذاع على قناة "الحدث اليوم": "عندنا مشكلة شديدة في تدبير العملة الصعبة وأنا عايز أقول لان احنا العملة الصعبة بيتم تدبيرها في حاجات مهمة جدا في الدولة المصرية وسداد ديون الدولة المصرية".

وأضاف: "الأولوية عند الإدارة في مصر الان هو ان احنا نسدد الديون واقساط الديون لأن مصر عمرها ما تخلفت عن ده ومينفعش أنك متسددش الديون بتاعتك؛ الأولوية لتسديد ديون مصر؛ عندنا نصف مليون مواطن يسافرون لاداء العمرة ولو كانت تكلفة كل فرد الفين دولار في نصف مليون يكون المبلغ كبير".

وتابع: "في وقت زي ما بيقولوا اللي يحتاجه البيت يحرم على الجامع؛ وأعلنت شركات السياحة توقف الحجوزات لرحلات العمرة خلال فبراير بسبب ارتفاع الريال في السوق السوداء إلى 16 جنيه؛ أنا حضرت لما كان الجنيه بأربعة ريال دلوقت الريال بـ 16 جنيه".

وواصل: "احنا داخلين على شعبان ورمضان والمصريين متعودين يروحوا في شعبان ورمضان والغالبية العظمي مصريين وأنا بتكلم بالمنطق ممكن نأجل العمرة سنة أو اتنين ومن الممكن نتأخر سنة او اتنين عشان نخرج من المطب اللي احنا فيه".

وأوضح: "الناس بتقول الأسعار بتتغير من لحظة للتانية؛ نخلينا كدة شهر أو شهرين أو خمسة العمرة مفتوحة طول السنة".

واقتراح الإعلامي سيد علي يأتي بعد أيام من اقتراح مماثل طرحة الإعلامي خيري رمضان وهو الاقتراح الذي تعرض لهجوم كبير على مواقع التواصل الاجتماعي.

واقترح "رمضان"، خلال برنامجه “مع خيري” عبر فضائية “المحور”، مساء السبت، إيقاف العمرة لمدة عام لتوفير العملة الصعبة، معقبًا: "مش هنروح النار لو معملتش عمرة السنة دي".

كما اقترح أن يكون الحج هذا العام في أضيق الحدود لمن لم يحج، متابعًا: "في ناس بتسافر مرة واتنين وتلاتة وفي ناس مش لاقيه تأكل، أنا كدولة أمنع العمرة هذا العام، والحج يكون في أضيق الحدود لمن لم يحج، هي دي قبضة الدولة أن تساعد هذا الشعب على العيش".