عمرو أديب يعلق على زيادة مدة انقطاع الكهرباء: "أنتوا بتصدقوا الحكومة؟"
علق الإعلامي عمرو أديب؛ على شكاوى المواطنين بشأن زيادة مدة انقطاع التيار الكهربائي من ساعة واحدة إلى ساعتين.
وقال أديب خلال برنامج "الحكاية" المذاع على قناة "أم بي سي مصر": "انتوا بتصدقوا الحكومة؟ هو ميقدرش يعمل أكتر من كدة يا يتعامل بصراحة ونشيل الشيلة مع بعض؛ في الأول خالص قالك بعد أسبوع مفيش حاجة وأما جه قالك ساعة بقت ساعة ونص أو ساعتين؛ هو ميقدرش يعمل غير اللي بيعملهولك دة".
وأضاف: "هي هتتقطع ساعتين وساعتين وربع وساعتين ونص وساعتين وتلات أربع؛ احنا بقينا نتفاوض على ساعتين او ساعتين ونص مهو كتير الساعتين بس حقيقة الامر أدي الله وادي حكمته مش عايز حضرتك مستني أن الشيء اللي هيتقال هيتعمل؛ هو حسب ما يقدر متخدش حاجة من المسلمات لأن في الموضوع دة حصل 5-6 وعود ومحصلش".
وتابع: "أي عربية محتاجة بنزين صيف أو شتا في بنزين مشيت مفيش وقفت؛ هي الظروف كدة الأسباب ايه؟ السادة أعضاء مجلس النواب بيتكلموا ويشوفوا؛ بيحملوا وزارة الكهربا يقولك عايز مازوت أنا عايز غاز هتروح لوزارة البترول هتقولك أنا محتاج أبيع الغاز؛ ارجوكم يعني دي الحكاية حاول بقي أنت تتصرف".
وواصل: "أنا لقيت ناس النهاردة بتقولك لا أنت قلتلي؛ قلتلك أه بس معرفتش وفي ظرف ضاغط عليا وحاجات مش قادر اعملها؛ الموضوع ده ملناش حيله فيه؛ لقيت ناس بتقولي بلاش نقطع النور من 2-5 العيال راجعة من المدارس وجه الناس بتوع باليل قالك لا العيال بتذاكر".
وأوضح: "أنا مشفتش في بيان الحكومة ان الموضوع يومين ويتحل؛ خلينا واضحين ياجماعة في مشكلة والمشكلة مستمرة؛ عايز بقي تقعد تقولي أصل دي مش الحرب أصل انت تقدر".
وأكمل: "بيان وزارة الكهربا قال يقود لسابق عهده سابق عهده دلوقت اللي هو ايه؟ الساعتين والا الساعة ونص والا الساعة والا الكهربا ترجع عادية؟ موضوع ترجع عادية دي مش دلوقت؛ لازم نبقى شايفين وفاهمين وبنتكلم بجدية وبمواجهة قولو للناس ياجماعة الوضع صعب".
وفي وقت سابق أعلن المتحدث الرسمي باسم رئاسة مجلس الوزراء المصري، سامح الخشن، في بيان رسمي، يوم الأحد أن زيادة فترة انقطاع الكهرباء في مصر التي بدأت منذ يوم السبت، جاءت نتيجة ارتفاع درجات الحرارة، وقال "حرصًا على استمرار تشغيل شبكة الكهرباء بشكل آمن، ستُخفّض الأحمال لحين عودة الحرارة إلى معدلاتها الطبيعية، وبعدها ستعود الأمور كما كانت".
