تامر أمين مندهشا من سعر أيفون الجديد: "ادخله في شقة ولا عربية؟"

عبر الإعلامي تامر أمين، عن دهشته من السعر الخرافي لهاتف أي فون 15 والذي طرح في السوق المصري خلال الأيام الماضية بسعر يقارب الـ 100 ألف جنيه.

وقال أمين خلال برنامج "أخر النهار" المذاع على قناة "النهار": "بتحصل حاجات لو كان حد قالهالي من كام شهر كنت قلتلة يلا يا مجنون من هنا؛ أنا أصحي الصبح ألاقي في تليفون محمول نزل السوق بـ 100 ألف جنيه؛ أنام بالليل ألاقي بنتي بتقول الـ 15 برو ماكس نزل وبيتباع بالسوق المصري بـ 100 ألف جنيه".

وأضاف: "موبايل بـ 100 ألف جنيه بعد كده ادخل الموبايل في شقة ولا عربية؟ هو في موبايل تقول منه ألو بـ 100 ألف جنيه وهي تحويشة العمر لأسر؛ زمان كنا نقول للشاب شد حيلك واتخرج واشتغل عشان تحوش الشبكة والمهر؛ دلوقت أقوله يلا اشتغل عشان تجيب موبايل".

وتابع: "عشان ايه؟ عشان شوية ناس وهزار ونصهم عاملين لهم بلوك؛ المصيبة الأكبر أن ألاقي طوابير هناك وهنا وناس بايته قدام المحلات عشان تشتري التليفون الجديد؛ أيه ياد الحلاوة دي؟ الهوس والجنان والفشخرة وصلوا لكدة؟".

وواصل: "التليفون مش مقدم أي جديد غير بس حاجات بسيطة في الكاميرات؛ لو هركبه ويوصلني الشغل ماشي أهو يبقي أحسن من العربية؛ في إيه يا بشر أيه حصلكم؟ كل ده من اجل الاستعراض أني أبقي أول واحد جبت التليفون الجديد".

وأوضح: "أنا مش مصدق دا وصل شركة موبايلات من كتر ما سعره خرافي بتقول تعالي أي فرع من فروعنا يوم الجمعة امسكه واتصور بيه بخمسة جنيه؛ مش مصدقين صح؟ من كتر فكرة الهوس وبقي عامل زي الجواهر".

وذكر: "المحل عامل عرض امسكه واتصور بيه عشان عارفين أن الناس مش هتقدر تشتريه؛ اللي مجنني مش سعره اللي مجنني ترقب الناس على أساس أن دي حاجة نازلة من الجنة يعني".

ويبلغ سعر آيفون 15 برو ماكس في مصر، نحو 100 ألف جنيه للنسخة 512 جيجا بايت، بينما يصل سعر النسخة 265 جيجا بايت إلى 85 ألف جنيه.

وطرحت شركة أبل IPhone 15 في الأسواق بعدة دول، من بينها السعودية ودولة الإمارات، بعدما كشفت عنه مؤتمر الشركة السنوي يوم 12 سبتمبر الجاري، وأتاحت حجزه في نفس اليوم.