تامر أمين يعلق على تصريحات الإعلامي السعودي وليد الفراج

علق الإعلامي تامر أمين؛ على ما أثاره المذيع السعودي وليد الفراج والذي اعتبره كثيرين تقليلا من قيمة الدوري المصري وديربي الأهلي والزمالك كأقوى ديربي في الشرق الأوسط.

وقال أمين خلال برنامج "أخر النهار" المذاع على قناة "النهار": "أحد المشجعين المصريين واسمه محمد أرسل رسالة إلى البرنامج الذي يقدمه وليد الفراج بيتكلم فيها عن الدوري المصري والديربي المصري والديربي السعودي ووليد قال إن ديربي النصر والهلال هو أهم ديربي في الشرق الأوسط ومحمد قاله ايه الكلام اللي بتقوله ده على كدة ديربي الأهلي والزمالك يبقي ديربي العالم".

وأضاف: "وليد رد على المشجع وقاله أركن على جنب شوية؛ كل الناس عارفة إن الكلاسيكو السعودي بين النصر والهلال هو أهم ديربي في الشرق الأوسط وبيتابعه 40 قناة عالمية وقال مع احترامي الديربي المصري والأهلي والزمالك مبيتفرجش عليه غير المصريين بس".

وتابع: "طبيعي تحول الموضوع إلى مباراة بين الشعب المصري والشعب السعودي وكل واحد بيدافع عن دوريه وعن الديربي بتاعه وكل واحد ماسك سيفه ودرعه وهات يا سجال ونزاع في المعركة وأنا قاعد بتفرج على الكلام دة وبعضعض على سناني عشان لازم نوقف المهزلة دي".

وأوضح: "هو مين اللي قال إنها خناقة أو مباراة وأن واحد لازم ينتصر في النهاية؛ عمرها ما هتحصل اللي هيحصل بس أن احنا طول الوقت بنكب بنزين على النار عشان تولع بس وهنا أنا مش طالع كإعلامي مصري أدافع عن الكرة المصرية أو الدوري المصري ولا احط من شأن الكرة السعودية".

وواصل: "على العكس تماما أني كمصري أنا من أكثر السعداء بالطفرة اللي حاصلة في الكرة السعودية وبالنجوم اللي بيمطروا على الملاعب السعودية ومن أكتر الناس سعادة بالجماهير في المدرجات السعودية لأن بلد عربي شقيق بحبه وأي حاجة بتحصل فيه بحس أنها عندي بالزبط".

وذكر: "الغلط فين بقي؛ متزعلش مني يا أستاذ وليد؛ اسمع مني هذه الكلمات وحطها في خانة عتاب المحب أو عتاب الزميل؛ حضرتك السبب في المشكلة؛ مينفعش ألوم على المشاهد اللي بعت لك الرسالة أبدا؛ أنت وقعت في الفخ يا أستاذ وليد؛ الفخ الأول أنك عملت منافسة ومباراة بينك وبين مشاهد وهذا لا يجوز".

واختتم: "يظل المشاهد مشاهد؛ واتعلمنا أن المشاهد دايما على حق حتى لو أخطأ أو تجاوز أو سبنا؛ مينفعش نرد؛ افتحلك المواقع على فيديوهاتي لمشاهدين اختلفوا معايا وشتموني مينفعش أني أرد عليه".