عمرو أديب يعلق على التعامل العالمي مع الغواصة الأمريكية ومركب الهجرة
علق الإعلامي عمرو أديب؛ على التعامل العالمي مع حادث الغواصة تايتان الذي راح ضحيته 5 أشخاص والتعامل مع غرق مركب الهجرة غير الشرعية والذي راح ضحيته 750 مهاجر معظمهم من مصر وباكستان.
وقال أديب خلال برنامج "الحكاية" المذاع على قناة "أم بي سي مصر": "تكلفة عمليات انقاذ الغواصة وصلت إلى 10 ألاف دولار؛ المركب اللي غرقت وفيها 750 ودول 5 في قاع المحيط الأطلنطي ولا حد اتحرك ولا حد راح 500 منهم 200 مصري غرقا لا حد بعتلهم ولا حاجة".
وأضاف: "التانية دي كان في طيارة أمريكية بتبعت ذبذبات عشان تلاقي الغواصة ودول ياعيني ملقوش حد؛ الغلابة بتوعنا اللي ماتوا دول العالم لم يهتم".
وتابع: "اية اللي حصل يا جماعة 750 ماتوا في منهم 250 باكستاني و200 مصري وعلى فكرة احنا قبضنا على ناس ومش عارف ايه؛ العشرة ليون دولار لو اتصرفوا على الناس دي مكانوش سافروا".
وواصل: "اللي اتعمل عشان ينقذوا خمسة متعملش عشان انقاذ الـ 750 أنت مين؟ التانيين دول غلابة؛ الباكستانيين راح 200 والمصريين راح 200 وحتى الأن بيقولك أبقوا ابعتولنا دي أن أيه عشان نقارن".
وأكمل: "ايه العالم غير العادل دة؟ وفي الاخر يقولك أنتوا ناس مفيش رحمة؛ لو تشوفوا المؤتمر الصحفي اللي اتعمل في بوسطن عشان الغواصة كأنهم بينتشلوا تايتانك؛ واقفين يتكلموا على خمسة وفي واحد بيعيط ورا من قوات الإنقاذ وبعدين قالوا للناس احنا سامعين تخبيط؛ تخبيط فين؟ أنتوا 4 ألاف متر تحت الماية".
وأوضح: "الديلي ميل البريطانية بتقول إن تايتانك قتلت خمسة كمان؛ والراجل مخرج تايتانك قال ايه؟ قال أنا نزلت 33 مرة عشان يعمل اخراج الفيلم طبعا كل الناس بتسأل أيه الحكاية؟ الموضوع يوريك عدم العدالة والكيل بمكيالين والاعلام ازاي بيبص ليهم وبيبص لينا الاتنين في أسبوع واحد وتقدر تشوف المقارنة الإنسانية المؤلمة".
وتوفي أكثر من 500 شخص غرقا في حادث غرق مركب يقل مهاجرين غير شرعيين قبالة سواحل اليونان وهو الحادث التي لم يشهد اهتمام عالمي كبير رغم عدد الضحايا الكبير فيما حصلت الغواصة الأمريكية التي فقدت في المحيط الأطلنطي وكانت تقل 5 سائحين على اهتمام واسع وعمليات بحث انفق عليها ملايين الدولارات.
