تامر أمين يهاجم اتحاد الكرة: دكتوراه في الفشل
هاجم الإعلامي تامر أمين؛ الاتحاد المصري لكرة القدم، مشيرا إلى أن إدارته للكرة المصرية تأخذ اللعبة من فشل إلى فشل أخر.
وقال أمين خلال برنامج "أخر النهار" المذاع على قناة "النهار": "اللي بيحصل في الوسط الرياضي وتحديدا في كرة القدم أصبح أمر لا يمكن السكوت عليه؛ طفح الكيل وزاد عن الحد وأي حاجة مهما كان فيها مبالغة أو قسوة هتبقي أقل من الواقع الأليم اللي عايشنه في الوسط الرياضي الكروي في مصر".
وأضاف: "اللي هقوله وبيحصل دة مبيحصلش في الوسط الرياضي بتاع كرة السلة أو الطايرة أو اليد؛ كل هذه الرياضات ماشية في سلاسة واحترام ونسق تصاعدي وكمان العلاقة فيها بين المتنافسين ممتازة سواء القائمين على اللعبة في الاتحادات أو بين الأندية".
وتابع: "شوفوا كدة مباراة الأهلي والزمالك في كرة اليد بيبقي الماتش نار بس بيخافوا على بعض وبيحبوا بعض وبعد الماتش تلاقي أحضان وقبلات لأنهم مرتاحين ونفس الحال في الكرة الطائرة والباسكت كل دة بيحصل في كل الرياضات فيما عدا كرة القدم لأن المناخ فاسد".
وأكمل: "شوفوا الاحتقان الحادث في كرة القدم شوفوا الخناقات اللي بتحصل في كرة القدم شوفوا الشتايم اللي بتحصل في كرة القدم شوفوا اللا إدارة في كرة القدم؛ كل حاجة بايظة هتلاقيها في كرة القدم لأن البيت فاسد؛ والفساد هنا مش مالي أنا بتكلم عن فساد إداري يعني فشل إداري متواصل".
وأوضح: "أنا مش هكلمكم عن انسحاب الزمالك من السوبر وبيراميدز يلعب مكانه أنا هكلمكم عن السبب اللي أدى للتفاصيل دي وهو بردو البيت الرياضي؛ اتحاد كرة القدم اللي مفيش حاجة غلط معملهاش؛ اتحاد الكرة مسك الدهب بقي تراب؛ كل حتة دهب يمسكها في الكورة يحولها بعبقرية إلى تراب".
وواصل: "قولولي على حاجة واحدة اتحاد كرة القدم الحالي عملها ونجحت قولولي على انجاز أو بطولة أو مسابقة اتعملت كدة سلسة والناس مشتكتش ومنسحبتش؛ ولا حاجة كله ضرب ضرب حتى مفيش شتيمة؛ فشل بعده فشل بعده فشل لدرجة أنهم عملوا ماجستير ودكتوراه في الفشل في إدارة منظومة كرة القدم ومع ذلك قاعدين بمنتهي الهدوء وطالعين في الاعلام وبينظروا وبيتكلموا؛ بأمارة ايه ياسادة وأنتوا الفشل أصبح ملاصق لاساميكم".
واختتم: "كل أشخاص اتحاد الكرة المصري لهم عندي كل الاحترام أما الأفعال فلا؛ احنا من شهور كنت بكلمكم أن اتحاد الكرة الحالي فشل في كل مهمة أسندت إليه؛ كل منتخبات الناشئين فشل في فشل ومنهم فشل بفضيحة".
