عمرو أديب يوضح تأثير النزاع في السودان على مصر
علق الإعلامي عمرو أديب، على النزاع الذي اندلع في عدد من المناطق داخل السودان بين قوات الجيش السوداني وقوات الدعم السريع.
وقال أديب خلال برنامج "الحكاية" المذاع على قناة "أم بي سي مصر": "الحرب ليست سهلة أنت بتضرب فين؛ النهاردة كان في مشهد لدبابة من الجيش السوداني بتضرب هدف وهي واقفه في ميدان مدني؛ واقفة في شارع فيه بقالين وجزارين؛ الدبابة بتضرب الناحية التانية ومش عارفين الذخيرة هتنزل فين".
وأضاف: "اللي بيسأل النهاردة مين اللي كسبان؛ على الأرض الجيش السوداني كسبان وعلى الجغرفيا والتاريخ السودان كله يعاني ولا أحد يعلم؛ ألا إذا الجهود اللي بتعملها الجامعة العربية ومصر والإمارات والاتحاد الافريقي نجحوا يقعدوا الأطراف مع بعض ويوصلوا لاتفاق".
وتابع: "أنا عايز بس أقول لحضراتكم أن بذور الازمة من أولها في ايه؟ في فكرة أن الدولة السودانية كانت عايزة الدعم السريع يندمج؛ وطبعا الدعم السريع مش عايز يندمج وعايز يفضل خارج نطاق الدولة ولكن بالتعاون مع الدولة؛ الدولة كانت بتحاول الفترة اللي فاتت دمج القوات برواتب ورتب مختلفة الامر طبعا اللي الناس بتوع الدعم السريع قالك لا أنا عندي فلوسي وسيطرتي ومناطق نفوذي".
وواصل: "ناس كتير بتحط الميزان العسكري ودول معاهم أيه ودول يعملوا ايه؛ هذا الامر كلما استمر أكثر وأكثر هو مؤثر عليك في مصر؛ الاضطراب في السودان مؤثر عليك في مصر في أمور كثيرة ليس أقلها سد النهضة وليس من مصلحة أحد أن يستمر السودان بهذا الشكل".
وأكمل: "ابتدينا نسمع في الهلال الأحمر السوداني عن مشاكل حقيقة في الدواء والغذاء وممكن تدخل في أزمة إنسانية حقيقة واللي بيدفع التمن الغالي هو المواطن المدني السوداني ولسه من ساعة الجيش السوداني بيحذر من اطلاق النار العشوائي من قوات الدعم السريع على الأحياء السكنية في الخرطوم".
وأوضح: "دقلو والبرهان يعرفوا بعض لمدة 20 سنة من 2003 ووصل لمرحلة أن دقلوا أصبح النائب بتاع البرهان؛ أنتوا كنتوا حلفاء جدا ماذا حدث".
وكانت اشتباكات قد اندلعت في عدد من المناطق السودانية صباح أمس السبت بين قوات الجيش السوداني وقوات الدعم السريع.
