أحمد موسى عن مواجهة الأهلي وريال مدريد: "فوزنا عليه قبل كدة وإيه يمنع يعني؟"

علق الإعلامي أحمد موسى؛ على تأهل الأهلي إلى نصف نهائي كأس العالم للأندية بعد تغلبه على فريق سياتل ساوندرز الأمريكي بهدف دون رد.

وقال موسى خلال برنامج "على مسؤوليتي" المذاع على قناة "صدى البلد": "الأهلي الشوط التاني استحواذ كامل ودائما القاضية تاتي من أفشة؛ في التوقيت المثالي والدقيقة 87 خلاص رايحين وقت إضافي والفريق الأمريكي صعب وعنده مهارات ولكن جاء أفشة؛ يشوط كورة تيجي في العارضة ترجع لأفشة يشوط تاني وكانت القاضية".

وأضاف: "القاضية في الدقيقة 87؛ هذا هو النادي الأهلي؛ بعض الناس لما الأهلي فاز على أوكلاند سيتي قالك الأهلي بيلاعب مدرسة؛ طيب النهاردة بيلاعب ايه؟ بيلاعب جامعة؟ خليهم يقولوا واللي بيقول قاعد برة والأهلي رايح يلاعب ريال مدريد".

وتابع: "ربنا كرمنا وفوزنا عشان نقابل ريال مدريد؛ على فكرة فوزنا عليه قبل كدة وايه يمنع يعني؟ هي في الأخر كرة قدم؛ ليفربول النهاردة بيتغلب تلاتة من فريق ولفرهامبتون أخر فريق في الجدول؛ ايه المشكلة الأهلي يلاعب ريال مدريد ويطلع النهائي".

وواصل: "الهلال السعودي أيضا تأهل؛ وهيلاعب فلامينجو البرازيلي؛ وبنقولهم مبروك كمان؛ يالها من نهائي لو حصل الأهلي والهلال ومفيش مستحيل في كرة القدم طول مانت رايح بإرادة قوية؛ ومعاهم الأسطورة الخطيب رئيس البعثة".

وأكمل: "سياتل الأمريكي قوي جدا؛ طبعا في ناس هتقول مش قوي ولا حاجة خلاص مش قوي مش مهم؛ مايعنيناش رأيكم ويعنينا أن الأهلي هيلعب في نص النهائي مع ريال مدريد؛ الملعب الـ60 ألف مليان والأهلي كأنه بيلعب في ستاد القاهرة مش بيلعب في طنجة؛ عشان تعرف العلاقات والشعوب مع بعضها".

وأوضح: "أفشة مش مصدق نفسه الجول جه في وقت أنت حاطط أيدك على قلبك؛ هو دة النادي الأهلي؛ الأهلي بيركز ومفيش حاجات شغلاه جانبية؛ هنلعب قدام ريال مدريد يوم الأربعاء".

واختتم: "ديانج لاعب من الدرجة الأولى وخوفي أنه يتخطف من الأهلي في نص الملعب ما شاء الله ولا أجمل ولا تقارن ديانج بأي لاعب في مصر لاعب على أعلى مستوى وقليل الأخطاء والكرة من رجله مسطرة لزميله؛ صفقة هائلة؛ الشناوي النهاردة شال الشوط الأولاني".