مصطفى بكري: "يا دولة اسمعي صوت الناس.. الشعب الدرع الحقيقي للبلد"
طالب الإعلامي مصطفى بكري؛ الحكومة بالاستماع إلى أراء الشعب المصري مشيرا إلى أن المصريين هم الدرع الحقيقي لحماية الوطن.
وقال بكري خلال برنامج "حقائق وأسرار" المذاع على قناة "صدى البلد": "أكيد كل واحد فيكم عنده رؤية أو كلمة أو رأي؛ لازم نفعل كل ده ما حنا مش هنقعد ساكتين ونشوف بلدنا والحملات شغالة ونقعد نتفرج؛ ضميرنا الوطني يمنع ده واحساسنا بالبلد يمنع ده".
وأضاف: "يا دولة اسمعي صوت الناس؛ الشعب هو الدرع الحقيقي الواقي للبلد؛ الرئيس قال أكتر من مرة أنتم شركائي في المسؤولية؛ الشراكة تعني أن احنا شركاء في صنع القرار وطرح الحلول يمكن بنشوف بعض الزملاء بيرفعوا السقف أوي والكلام النهاردة يدغدغ مشاعر الناس".
وتابع: "عايز تعمل بطل دلوقت اضرب بوقين فوق وقول أي كلام؛ أنا مدرك أن في أوجاع ومشاكل للناس لكن مدرك أن في بلد؛ أنت وأنا لازم نحافظ عليها بدون مزايدة وبدون ما أخد الجماهير إلى حته هندفع تمنها؛ إذا مكناش نصرف بعقلانية أنا في أزمة وعايز أقف جنب بلدي المستهدفة المحاصرة اللي بتعاني من مشاكل".
وواصل: "أنا عايز ولادي وأحفادي يتربوا في جو كويس؛ في قيم كويسة ويلاقوا لقمة عيشهم ويلاقوا الستر؛ احنا في منحني صعب وبنواجه تحديات كثيرة؛ مش هقول ننسي ألمنا لكن لازم نبص لقدام؛ احنا شعب مصر أحنا مصر للي مش عارف شعب مصر".
وأوضح: "أنا بشوف الابتسامة اختفت من وجوه كثيرين لازم نبتسم رغم الألم ونحس بتراب البلد دي ونقف معاها؛ بلدك يا مصري بتواجه تحديات ومطلوب تتكسر وتقف ومتفكرش لمتر قدام أحنا عندنا موروث حضاري وثقافي وعندنا حاجات كتير نقدر نعتز بها".
وأكمل: "أنا بخاطب ضمير كل مصري؛ أنا عارف في ناس موجوعة كتير وشباب بتقول نهاجر من البلد دي عارف ناس مفروض تتحاسب وعارف في لصوص وفسدة لكن عارف في المقابل أن في بلد؛ بلد بتدعو كل مصري يقف معاها بلد بتقول لأي مصري جوة أو برة بيغير في السوق السوداء عشان يحرم الدولة من الدولار أنت متعرفش بيروح فين".
واختتم: "لازم نقف مع مصر وكلنا نحط أيدينا في ايدين بلدنا عشان نعدي الأزمة؛ عدى الأزمة وتعالي نتكلم ونتحاسب وتعالي نرسم ملامح التاريخ الأتي".
