أحمد موسى ينتقد ترويج الشائعات: "بنأذي نفسنا ونساعد على قفل بيوت الناس"
أكد الإعلامي أحمد موسى؛ أن إطلاق البعض الشائعات دون علم يؤدي إلى مشكلات في الاقتصاد المصري مشيرا إلى أن الشائعات تقلل من فرص الاستثمار في مصر.
وقال موسى خلال برنامج "على مسؤوليتي" المذاع على قناة "صدى البلد": "للأسف ناس تلاقيهم كدة يرددوا شائعات عن ايه؟ النهاردة أي حد عايز يجيلك مصر يستثمر؛ هو بيبص على الوضع في البلد عامل ايه؛ السياسات المالية والنقدية كويسة والا لا؛ الضرائب كويسة والا لا التسهيلات اللي بياخدها جيدة والا لا".
وأضاف: "لو في مصنع النهاردة اتهز زي ما حصل في فترة من الفترات وبعض المصانع خفضت من انتاجها 50% ودا معناه أن 50% من العمالة هتقعد في البيت".
وتابع: "من الذي تأثر؟ أنا كعامل تأثرت ومرتبي اللي كان بيجيلي مش هيجيلي؛ وأنا هنا أثرت على أسرة كاملة وعدد كبير من الأسر؛ الأهم بالنسبالنا أن أنا أشغل ناس والا الناس متشتغلش؛ أكون أنا مناخ ومواطن أساعد الاستثمار والا أكون طارد للاستثمار".
وواصل: "أنا هنا بقول اللي بيضرب شائعات واللي بيروج بطريق غير مباشر للشائعات؛ وامبارح السيد الرئيس قال أسمعوا من حد مسؤول مترميش ودانك لأي حد".
وأوضح: "أنت عارف صندوق النقد الدولي النهاردة بيقول لأمريكا ايه؟ استمروا في رفع الفوائد أنت عارف دة معناه ايه؟ معناه أنه بيسحب البساط من الدول والاهم النهاردة أن عايز مستثمر يجيلي والا لا؛ المستثمر اللي يجي يلاقي ناس طول الليل والنهار عمالة تشوه في مناخ الاستثمار دا أنهي بلد دي وانهي ناس اللي عمالين يسودوا عيشة الناس".
وأكمل: "العالم كله كل واحد عايز ياخد جزء من كعكة الاستثمار؛ عايز حضراتكم لو سمحتوا لأننا بنأذي نفسنا بنفسنا والبعض مننا بيساعد على اغلاق بيوت ناس مجرد ما تجري ورا دة وتقول بعنا؛ الرئيس قالكم امبارح لو في حاجة بعملها بطلع أقول الرئيس أكتر حد صريح مع الشعب".
ولفت: "الرئيس قال الظروف صعبة وفي ارتفاع أسعار والدنيا غالية والناس بتشتكي؛ دا تأكيد على الشفافية مع الشعب ولكن مسألة أن احنا والبعض مننا يكون شريكا أن البلد دي يحصل عندها أزمة ضخمة".
واختتم: "يوم الأربع تم طرح شهادات من بنك مصر والبنك الأهلي بعائد 25% أعلى عائد؛ لها إيجابيات وسلبيات ولكن البنوك مضطرة أنها تعمل دة؛ هو أنا النهاردة أقدر أقول مرتبات الناس هل مناسبة للأسعار والغلاء؟ لا والرئيس نفسه قال كده".
