مصطفى بكري يطالب رئيس الهيئة الوطنية للإعلام بالرد على مطالب ماسبيرو
طالب الإعلامي مصطفى بكري؛ رئيس الهيئة الوطنية للإعلام السيد حسين زين بالرد على مطالب العاملين في ماسبيرو والكشف عن الخطوات التي اتخذها لحل مشاكلهم.
وقال بكري خلال برنامج "حقائق وأسرار" المذاع على قناة "صدى البلد": "أنا اتكلمت عن ماسبيرو فترات طويلة وطلبت اننا نلاقي حل للناس اللي هناك واللي بتعاني من مشاكل مادية ومعنوية؛ والمظاهرات داخل المبني انتهت وكانت مظاهرات محترمة ورفضوا أي حد يخرج خارج المبني وكان كلامهم محترم يتمثل في المطالبة بتطوير ماسبيرو وأنهم يخدوا حقوقهم في المعاشات وأن يبقالهم كادر وأن يكون عندهم ديكورات".
وأضاف: "ياتري بعد الصفحة دي ما اتقفلت صحيح حالة الغليان موجود والناس مشيت وانتظرت الحل؛ أدعو الأستاذ حسين زين أنه يخرج ويقولنا اية اللي اتعمل من منطلق الشفافية لأن الناس منتظرة أن يكون في قرارات؛ كان اتقال إن بعض الناس هتروح أماكن أخرى على كوادر أفضل ايه اللي عملتوه مع جهاز التنظيم والإدارة؟".
وتابع: "قولولنا ايه اللي تم؛ هل الناس هتروح أماكن كويسة والا لا؛ هل هتصلحوا الأوضاع في ماسبيرو بحيث يكون موجود على الخريطة أنا بطالب أخي الأستاذ حسين زين يطلع يقولنا عملتوا ايه؛ قوليلنا يا حكومة ياللي أنتي مسؤولة بالأساس وقولنا يارئيس الهيئة الوطنية للإعلام إيه اللي حصل؟".
وأوضح: "في ألاف البشر في ماسبيرو بيغلوا ومازالوا بيغلوا واحنا مش هنسيب الأوضاع بهذا الشكل إذا كنا بنقول ماسبيرو أمن قومي ولا يمكن لأحد أنه يتجاهل دور ماسبيرو ولازم يكون في حل؛ أنا بطالب رئيس الحكومة يا فندم أقعد مع رئيس الهيئة الوطنية للأعلام وأوصلوا لحل لكن قبل ما تقعد أنا بطلب من أخي حسين زين أنه يطلع في التلفزيون المصري أو أي وسيلة إعلامية وتقولنا عملت ايه".
وأكمل: "عايزين نعرف الدنيا ماشية ازاي والبلد بتمشي فين في ذلك الاتجاه؛ أنا يمكن اتكلمت مع أستاذ حسين زين من أيام وأنا قولتله مش شايف موقف عدائي من الدولة ولا أي حاجة وأنا بدعو الأستاذ حسين زين أنه يطلع بشفافية تامة ويقول ياجماعة الأوضاع كذا والحكومة مقصرة في كذا؛ الناس عايزة تسمع لأن احترام الرأي العام مسألة مهمة جدا وأي حد بيقول كلمة مش بالضرورة أنه ضد الأستاذ حسين زين".
واختتم: "أنا بطلب منك تطلع تقول للناس دي والله أنا خلصت فلوس المعاشات والله الكادر كذا والله هدور على ديكورات للناس الغلبانة دي وأنت لازم تكون المدافع الأول عن ماسبيرو".
