هدى المفتي عن مشاركتها بـ 3 أفلام في عيد الأضحى: صدفة بحتة
حلَّت الفنانة هدى المفتي ضيفة على برنامج "معكم منى الشاذلي"، مساء اليوم الخميس، لتتحدث عن أعمالها الفنية الأخيرة، والنجاحات التي حققتها في موسم أفلام عيد الأضحى بمشاركتها في 3 أفلام؛ "كيرة والجن" و"بحبك" وعمهم".
أوضحت "هدى" خلال حوارها مع الإعلامية منى الشاذلي، عبر قناة cbc، أن عرض الأفلام الثلاث في نفس الموسم لم يكن مخططا له من البداية، بل الأمر صدفة بحتة بعيدة عن أي ترتيبات، قائلة: "مهما بنرتب الدنيا مابتمشيش زي ما إحنا عايزين بالذات في الشغل.. اللي حصل صدفة بحتة، أنا بقالي 3 سنين شغالة على فيلم (كيرة والجن)، وفيلم (عمهم) بنصور فيه من الصيف اللي فات وكان المفروض ينزل في راس السنة ثم اتأجل لأجازة العيد الصغير ثم للعيد الكبير، وفيلم (بحبك) تامر حسني لما جالي بدأته على طول وأكيد مش هقول لأ لفيلم لتامر حسني".
تابعت أنها بالأصل كانت تتوقع عرض كل فيلم في توقيت مختلف، وكانت تعتبرها فرصة جيدة حتى تستطيع الحصول على إجازة لفترة كبيرة، لكن ما حدث خالف كل توقعاتها، قائلة: "الترتيب الأصلي إن كل فيلم كان هيبقى في موسم مختلف، بعدين لقيت بيكلموني إن الـ 3 أفلام نازلين مع بعض، في الأول خوفت عشان كنت عاملة حسابي إن هينزل فيلم كل فترة وأنا هريح في النص وأخد أجازة، لكن كلهم نزلوا في وقت واحد فأنا دلوقت معنديش حاجة خلاص".
وعن رد فعلها حول نجاح الأفلام الثلاث، أعربت هدى المفتي عن سعادتها من ردود فعل الجمهور على الأعمال ككل، وعلى أدوارها تحديدًا، موضحة أنها كان لديها تخوفات شديدة حول أدائها، وأنه قد لا يحبه الجمهور في أي عمل منهم، مضيفة: "الأفلام التلاتة مختلفين وكل واحد فيهم تحس إن ليه جمهوره، وبصراحة التلاتة ناجحين أوي، قعدوا يقولوا لي أنتي حاطة في بطنك بطيخة صيفي وضامنة إيرادات العيد لكن أنا كنت خايفة إن الناس ميعجبهاش أي دور من الأدوار، كنت خايفة الناس متحبينيش بس الحمد لله".
وبسؤالها عن كواليس تعاونها مع المخرج مروان حامد في فيلم "كيرة والجن"، قالت هدى المفتي: "أستاذ مروان حامد كمخرج مختلف تماما، أي حد يتمنى يشتغل معاه، خصوصا لو هيحطك في دور جديد، زي ما يكون هيصبك في قالب معين وهيشكلك بتشكيلة جديدة، فكنت متأكدة إن هبقى طالعة حاجة صح جدا.. لذلك في العرض الأول للفيلم كنت مبسوطة أوي وحاسة بالرضا عن نفسي وإني قدمت دور مهم".
