عضو نقابة الأطباء يهاجم ميدو: خليك في الكورة

أكد الدكتور إبراهيم الزيات؛ عضو مجلس نقابة الأطباء؛ أن النقابة ضد إلقاء الاتهامات على الأطباء بشكل عام مشيرا إلى تصريحات أحمد حسام ميدو والتي أثارت غضب النقابة.

وقال الزيات في مداخلة هاتفية مع برنامج "حضرة المواطن" المذاع على قناة "الحدث اليوم": "مصر معرفتش تاخد بطولة الأمم الأفريقية إلا ما الكابتن حسن شحاتة خرجه من الملعب؛ جاي يتكلم على الطب؟ طيب خليه في الكورة".

وأضاف: "الموضوع في منتهى البساطة أننا ضد التعميم ومينفعش يتقال معظم أطباء مصر معندهمش ضمير ومينفعش يتقال الأطباء بيخدوا فلوسهم من جيوب الغلابة؛ الأطباء بيخدوا فلوسهم من علاج الغلابة".

وتابع ساخرا: "خليهم يهتموا بالكورة اللي ضايعة في البلد جاي يتكلم في الطب؛ اكتر حاجة بنخسر فيها فلوس وشغل هي الكورة جاي يتكلم في الطب".

وأكمل: "أنا كنت فاكر الناس اللي بتسافر أوروبا بتكتسب خبرات ومهارات جديدة في التعامل ولكن يرجع يتكلم زي أي حد معندوش أي ثقافة خالص؟ الأمور صعبة جدا".

وأوضح: "أحنا أول ناس بتطالب بتطوير المنظومة الصحية ودة مش معناه أن المنظومة الصحية وحشة ولكن احنا بنطلع للأحسن؛ انما نهدم كل حاجة كدة؟ دا حرام ميرضيش حد أبد؛ يعني أطلع أقول كل منتخب مصر يروح؟".

واختتم: "احنا خدامين المرضى والمفروض الكابتن ميدو يطلع يعتذر عن اللي قاله؛ ينفع يقول أنا هلم الأخطاء الطبية واعمل بيها مش عارف إيه؟ أحنا أصلا منعرفوش عشان نهتم باللي يقوله".