تامر أمين مدافعًا عن "السولية": لاعبو الأهلي متفرحش بالميدالية الفضية
كشف الإعلامي تامر أمين، أسباب إلقاء عمرو السولية لاعب النادي الأهلي لميدالية المركز الثاني والتي حصل عليها الفريق بعد الخسارة أمام الوداد المغربي في نهائي دوري أبطال أفريقيا.
وقال خلال برنامج "أخر النهار" المذاع على قناة "النهار": "تعالوا بقي نرجع للقطة، في ناس كتير أوي ومنهم بعض الإعلاميين، مسكوا عمرو السولية وسلخ شديد بعد ما رمى ميدالية المركز الثاني في دوري أبطال أفريقيا، وقالوا إن الفعل ليس له علاقة بالأخلاق والروح الرياضية، ويجب أن يعتذر عنه".
وذكر: "أنا فاهم هما بيقولوا كدة ليه؛ هما بيقولوا كدة لأنهم مش أهلاوية؛ وعمرهم ما هيفهموا السولية عمل كدة ليه؛ لو فهموا الأهلاوية بيفكروا أزاي كانوا قالوا للسولية تسلم إديك"، مضيفًا: "السلوك دة ملوش علاقة أنه سلوك مش رياضي أو أخلاق رياضية لأنه لم يحدث على المنصة؛ البروتوكول الرسمي خلص دلوقت الميدالية بقت في حوزته؛ أي حد في الدنيا وأي نادي في أفريقيا بما في ذلك الوداد يفرح جدا بميدالية المركز الثاني ولكن الأهلاوي لا".
وأكمل: "لاعبو الأهلي متفرحش بالميدالية وميحبش اللون الفضة بالنسبة له دي حاجة لا تستحق الاحتفاظ بيها عشان كدة وهو ماشي راح راميها والعيال وهما داخلين الأهلي وهما صغيرين بيتربوا أن المركز الثاني زي الأخير".
وأوضح: "دولاب الأهلي ودولاب السولية مليان بدروع وميداليات دهب ومش هيجي على أخر الزمن يبقي فرحان أن يضملهم واحدة مركز تاني".
واختتم: "أضف إلى ذلك أنها في حد ذاتها رسالة أن خدوا الميدالية اللي مغموسة بالفساد والتظبيط والتربيط ميشرفش أني أحتفظ بيها عشان كدة بقولكم اللي معندوش الروح دي عمره ما هيفهم عمرو عمل ايه".
