أديب يهاجم محرمي الترحم على شيرين أبو عاقلة: "دافعت عن الإسلام أكتر منكم"
هاجم الإعلامي عمرو أديب؛ بعض الدعاة الذين حرموا الدعاء
بالرحمة للصحفية الفلسطينية شيرين أبو عاقلة والتي استشهدت على يد جنود الاحتلال الإسرائيلي.
وقال أديب خلال برنامج "الحكاية" المذاع على
قناة "أم بي سي مصر": "الست في دمها وفي ناس معندهاش دم يقولك لو
سمحت متطلبهاش الرحمة مينفعش؛ طب استني معلش نبقي نعمل ندوة طيب عزي فيها الأول
واشتم الإسرائيليين وبعدين قولنا لا يجوز الرحمة".
وأضاف: "لا بتجوز ومش انت اللي بتقرر مين اللي
بيرحم؛ مهو الشيخ اللي علمك معلمكش صح؛ لمصلحة مين أن أنا يبقى عندي مسيحيين
عايزين يرجعوا من اللي قروه ياخي معلش ياخي أصبر".
وتابع: "هو ده اللي ربنا قدرك عليه؟ الله يرحمها يا
سيدي وانا مسؤول قدام ربنا مش هيقولي أنت قلت الله يرحمها ليه انت يابني أو انتوا
مصرين أن الناس تكرهكم".
وأوضح: "لو أنا واحد مليش في الدين ده ولقيت ناس
بتقول مينفعش تترحم عليها هقول ايه؟؛ هو بطرس وتادرس وبنيامين اللي بيموتوا في
الصحراء في سيناء وانت قاعد في التكييف دول لا يجوز عليهم الرحمة؟".
وأكمل: "الست دي دافعت عن الأقصى وعن الإسلام أكتر
من أي واحد فيكم انا استفدت اية النهاردة وأنا ضد الاحتلال وبتقولي متقولش الله
يرحمها؛ لا الله يرحمها ويحسن إليها".
واختتم: "انت عارف ربنا هيعمل معاها اية؟ انت معاك النتيجة
من الكنترول بتاع الجنة؟ دا نبي الرحمة ودين الرحمة ورب الرحمة؛ المسلم كيس فطن؛
لو ليك رأي خليك فطن هو ده الذنب الوحيد اللي انت شفته؟ مشفتوش الذنب بتاع الكفرة
دول".
