تامر أمين يوجه رسالة للإعلاميين الرياضيين: "اللي معندوش كلمة حلوة يسكت"
علق الإعلامي تامر أمين؛ على أزمة ملعب نهائي دوري أبطال
أفريقيا والذي انفجرت بعد إعلان الاتحاد الأفريقي تنظيم المباراة النهائية للبطولة
في المغرب.
وقال أمين خلال برنامج "أخر النهار" المذاع
على قناة "النهار": "نروح لقضية الأهلي العادلة وأنا مصر على أنها
قضية وعادلة وفي حاجة أنا مستغربها جدا؛ احنا مش بنتكلم مصر ومغرب؛ المغرب والوداد
مش خصم لينا واحنا خصمنا الاتحاد الأفريقي
وأضاف: "الحاجة اللي أنا مستغربلها جدا بعض الأصوات
الإعلامية والرياضية أنا تابعتها امبارح والنهاردة مصريين إعلاميين مصريين؛ بدأوا
يتكلموا بنبرة أنا حاسس فيها بحالة من حالات الاستسلام للأمر الواقع ويقولولك الأهلي
قوي ويكسب في أي حتة ودا حق ويراد به باطل ومش في مكانه".
وتابع: "احنا عارفين أن الأهلي مبيخافش من حد ويقدر
يلعب في أي حتة؛ دا ايه علاقته بالعدل هو الأهلي الكبير القوى هل من سماته أن
يتنازل عن حقوقه؟ أنه يتلقى قرار ظالم من الاتحاد الأفريقي فيسكت ويقول خلاص تمام؛
لا الأهلي يكسب في أي حته لما يكون في تكافؤ فرص ولما يكون محافظ على حقوقه لان دي
من سمات النوادي الكبيرة".
وأكمل: "لو كان الاتحاد الأفريقي قرر أن المباراة
تتلعب في القاهرة كنت طلعت قلت حرام؛ دا في ظلم لنادي الوداد ذنبه ايه نادي الوداد
أن المباراة النهائية تتلعب وكل الكفة في صالح صاحب الأرض".
وواصل: "أرجو من الإعلاميين الرياضيين لو معندهمش
كلمة حلوة في الحتة دي يسكتوا أحسن مش يكسروا عزائمنا في نضالنا المشروع في القضية
العادلة وأنا بقولكم إن الاتحاد الافريقي هينخ وهيجيب ورا وإن ان شاء الله المباراة
دي تتلعب في أرض محايدة".
واختتم: "مش معقول الضغط العالمي اللي معمول دة
يروح كدة؛ بنتكلم عن تصريحات لرئيس الاتحاد الدولي وصحفي انجليزي كبير اللي حصل دة
مشفتوش في حياتي أن يتلعب اتنين نهائي سنتين على التوالي في نفس الدولة".
