عمرو أديب: "مرسي والشاطر كان بينهما غيرة شديدة.. والبلد كانت عزبة"

أكد الإعلامي عمرو أديب؛ أن جماعة الإخوان الإرهابية لم تكن لديها القدرة على إدارة الدولة المصرية لافتا أن الرئيس المعزول محمد مرسي لم يكن يحكم البلاد ولكنه كان يتلقى التعليمات من خيرت الشاطر.

وقال أديب خلال برنامج "الحكاية" المذاع على قناة "أم بي سي مصر": "جه وقت كان خيرت الشاطر ومرسي بيغيروا من بعض غيرة شديدة؛ اسم الاستبن جه لمرسي ازاي؟ خيرت الشاطر كان هيبقي أول رئيس منتخب لمصر ولكن حصل في الأمور أمور؛ هو رئيس الصدفة".

وأضاف: "الإخوان كان موتهم وسمهم ايه؟ أنه كان عايز علاقات مع الإمارات وخيرت الشاطر كان يذهب للإمارات ويجلس بالساعات أنه بس يقعد في لوبي فندق ويشوف حد مسؤول ويجري عليه ويقوله عايزين نتكلم".

وتابع: "عندما ذهب الشاطر وطلب الافراج عن الإخوان المسجونين هناك؛ قالوله أنت عايز دول بس؟ ما في مصريين تانيين في السجن قاله لا طلعلي دول بس".

وأوضح: "كانت عزبة؛ انت جبت مكتب الارشاد كله في 15 يوم لسببين أولا كفاءة الأمن المصري وثانيا هما خونة وكانوا بيخونوا بعض أقسم بالله الناس دي كانت بتخون بعض" مضيفا: "الناس دي لم يكن لها لا شرف ولا كرامة؛ الناس دي ربنا خلصنا منهم؛ هو في وقت الاخوان كان في حقوق إنسان بردو أنا مش هتكلم".

وواصل: "اتقتل في عهد الإخوان صحفي واتعذب العديد من الصحفيين والشباب؛ الأهم رسميا وجهارا نهارا كان في تهديدات بالقتل ومش هتكلم عن نفسي؛ رسمي هنقتلك ديموقراطية اية بتاعة الإخوان دي".

واختتم: "مسلسل الاختيار كان رحيما بالإخوان؛ الاخوان كانوا أسوأ من كدة بكتير وكانوا بيعملوا مليشيا وحاجات موازية للجيش وللشرطة البلد كانت مش بتتباع؛ البلد كانت بتقطع الاقتصاد واقع ومفيش رؤية ومفيش فكرة ولا خطة".