عمرو أديب يسخر من "الجزيرة": عندهم مشكلة مع ياسر جلال

سخر الإعلامي عمرو أديب من موقف قناة "الجزيرة" القطرية من مسلسل الاختيار وذلك بعد أن أذاعت القناة تقرير يهاجم المسلسل الذي يعرض حاليا خلال شهر رمضان.

وقال أديب خلال برنامج "الحكاية" المذاع على قناة "أم بي سي مصر": "في واقع الأمر عشان منظلمش الجزيرة؛ الجزيرة معندهاش مشكلة مع المسلسل الجزيرة بيكرهوا ياسر جلال جدا ودة من زمان وأول ما جه ياسر جلال الجزيرة اضايقت".

وأضاف: "أوعوا تفتكروا أن موقف الجزيرة ضد مصر أو ضد 20 يونيو؛ الجزيرة اتصالحت معانا وكويسة جدا الجزيرة ضد ياسر جلال لو كان حد تاني عمل الدور مكانش هيبقي في مشكلة".

وتابع: "لو جبتوا أمير كرارة يعمل عبد الفتاح السيسي هي الجزيرة من زمان عندها تار مع ياسر جلال بيكرهوه عمى؛ ياسر جلال مش قابلينه".

وأوضح: "مهما عمل ياسر جلال هتفضل في مشكلة مع ياسر جلال إنما الجزيرة حلوين وكويسين ومواقفهم هايلة مقدرش أقول حاجة دا وزير الخارجية كان هنا وتمنى لينا الفوز في مباراة السنغال أكتر من كدة ايه".

واختتم: "يبقي المشكلة فين؟ ياسر جلال؛ مش أحمد السقا ولا كريم عبد العزيز ولا أحمد عز؛ المشكلة مع ياسر جلال شخصيا إن شاء الله موضوع ياسر جلال نقدر الجزيرة بعد شوية وأنهم يعملوا تقرير تاني أن المسلسل بيشوف بطولات المصريين وإرادة المصريين وأن ياسر جلال كويس ومظنش أنهم هيقولوا ياسر جلال كويس".