عمرو أديب: الزمالك مش هياخد حاجة السنادي.. الفريق عايز وقفة من 20 سنة
علق الإعلامي عمرو أديب؛ على تراجع مستوى
نادي الزمالك وقرار مجلس الإدارة بالاستغناء عن عدد كبير من لاعبي الفريق
الأساسيين.
وقال أديب خلال برنامج "الحكاية"
المذاع على قناة "أم بي سي مصر": "كل سنة كانت الدنيا تبقي متكسرة
وكنت بقول هناخد كاس هناخد أفريقيا؛ السنادي الزمالك مش هياخد حاجة خالص السنادي
لا دوري ولا كاس ولا بطولة أفريقيا ولا أي حاجة".
وأضاف: "الوضع اللي احنا فيه غريب وعجيب
النادي دة لما مكانش فيه مجلس إدارة ومفيهوش فلوس خد الدوري وعندنا استقر النادي
في حاجة بتحصل غريبة بقالها 20 سنه اللي هو أزمة في نادي الزمالك ومشكلة في فريق
الكرة نعيد بنائه تاني وأزمة ميتخلصش".
وتابع: "النهاردة مشوا كل اللاعيبة
معناه أن بقيت السنة بنبني فريق جديد بقالنا 20 سنه على الحال دة يقولك أصل كان في
أزمات في النادي ودلوقت بقينا كويسين وهنبني من أول وجديد".
وواصل: "السنة اللي شمينا نفسنا فيها
كنا على الأرض كان الزمالك ملكي وملعلع هيقولك بقي دي مشكلة المدرب الجديد أنه لسة
مش عارف اللاعيبة والنهاردة 7-8 لاعيبة مشيوا ويقولك حد من اللي بيفهم في الكورة
يقولك النادي محتاج وقفه؛ مهو محتاج وقفة من 20 سنه".
وأكمل: "الزمالك هيفضل في الدايرة دي
مشكلة لا أزمة لا لازم نغير الفريق لا النادي محتاج أزمة؛ وأخرتها؟ احنا شوفنا
الأهلي في أسوأ مراحله وهو بيغير الفريق كله كانت وقفة الأهلي موسم واحد وبعد كدة
بقي عنده فريق بالملايين وطاير".
واختتم: "الزمالك لا هياخد دوري ولا كاس
ولا بطولة أفريقيا وأشك أنه هيحافظ حتى على المركز الثاني لأن أحنا قررنا أن نفك
الفريق ونركبه تاني".
