هاني شاكر لمطربي المهرجانات: "كنتوا بتعملوا إيه قبل أعراض الغناء؟"

أكد الفنان هاني شاكر أنه شعر بإحساس متناقض خلال افتتاح قاعة الموسيقي بمدينة الفنون بالعاصمة الإدارية حين كان يستمع للأوركسترا فيما يواجه أزمة مطربي المهرجانات.

وقال شاكر في مداخلة هاتفية لبرنامج "أخر النهار" المذاع على قناة "النهار": "كنت بسرح في بعض الفيديوهات اللي بيشوفها الولاد الصغيرين؛ وزيادة عدد المشاهدات اللي في الغالب بيكون فيه شيء خارج".

وأضاف: "قانونا لا يمكن ممارسة مهنة دون ترخيص؛ هل ينفع أني اروح أبني عمارة وأنا مش مهندس وأقول أصل أنا بحب البناء وما يسري على النقابات بيسري علينا".

وتابع: "كان لازم نبلغ دور الأفراح والحفلات أن المجموعة دي ملهاش علاقة بالنقابة وبالتالي مش من حقهم أنهم يشتغلوا؛ المنع أني مديلوش تصريح أنه يكون متواجد في مسرح أو يطلع في حفلات؛ لكن يطلع على قناته في اليوتيوب هو حر أو يطلع يغني برة براحته".

وواصل: "النقابة تقوم بعمل محضر للمكان اللي هيجيب الناس الموجودة في القايمة الممنوعة وبنبلغ شرطة السياحية وممكن العقوبة توصل لغلق المكان؛ فنيا مينفعش دول يغنوا لأنهم أساسا ممتحنوش؛ في فيديوهات ليهم وتشوف بيغنوا ازاي؛ الغنا مش بالعافية ومينفعش أسوق طيارة بالعافية أو أعمل عمليات جراحية بالعافية".

وأكمل: "الناس اللي بتمتحنهم دي دول ملحنين ومؤلفين على مستوى بيشوفك عندك الموهبة أو لا ولو معندكش هو مش بالعافية والموضوع مش أكل عيش طيب قبل ما تظهر عليك أعراض الغناء كنت بتشتغل ايه؟".

وأوضح: "اتكلمت عن شعبة الراب بالعموم؛ زي ما احنا متفهمين التطور في الموسيقي ولما قدم بعض الولاد اللي فيهم بينجح بياخد تصريح وقصدت أن مش ضد أي فن واشترطنا على اللي نجحوا انهم ميقولوش كلام ضد القيم والعادات وبنحاول نضمهم ونفهمهم أن الفن رسالة وقلت أن أبني ومراته راحوا حفلة ويجز".

واختتم: "المنع مش أني بحجر على موهبتهم أن كان لديهم موهبة؛ أنا بنظم وضع ومينفعش أخلي حد يشتغل وهو معاهوش تصريح من النقابة بممارسة المهنة".