بعد تداول شائعات عن إصابتها بالسرطان.. عبلة كامل:«اتقوا الله»

كتب بلال فضل منشور حول الشائعات المتداولة، بشأن إصابة الفنانة عبلة كامل بالسرطان واعتزالها، قائلًا:« الفنانة الكبيرة الأستاذة عبلة كامل طلبت مني أوصّل الرسالة دي لعلها توصل لأي حد بينشر إشاعات عن حياتها وصحتها».

وقالت عبد كامل فى رسالتها التى نقلها  فضل:« عيب، والله العظيم عيب، لو الناس مش هتتقي ربنا وتخاف منه في وقت زي ده هتتقيه وتخاف منه امتى؟ وإيه اللي هيستفيده إنسان من إنه يقلق حياة الناس بكلام كذب، بيدعي إنه بينشره لإنه محب أو معجب، أنا اخترت نمط حياة سعيدة بيه وراضية عنه، وما عنديش أي حسابات على السوشيال ميديا ولا هيبقى عندي في أي يوم من الأيام، ولا بتابع السوشيال ميديا ولا بنشر عليها أي شيء من أي نوع ولا مهتمة بده».

وأضافت الرسالة:« أتمنى اللي يشوف حساب منسوب ليا يساهم في قفله باللي يقدر عليه والحساب اللي عاملاه.. واحدة بتدعي إنها بنتي مالوش أي علاقة ببناتي فاطمة وزينب، وكل اللي بيتنشر فيه كذب، والكلام اللي اتنشر في هذا الحساب عن إني مش فخورة بفني وبشغلي كله كذب وافترا، والحمد لله أنا في أحسن صحة وعافية، وبأشكر الناس الطيبين كلهم على محبتهم وتقديرهم اللي أنا ممتنة ليها وبأحمد ربنا عليها، وربنا يتقبل دعواتكم الجميلة ليا ويخلي لكم حبايبكم».