عمر كمال عن بوست «شمر واشتغل»: «أنا دبلوم صنايع ووصلت لهدفي»
رد مطرب المهرجانات عمر كمال، علي الانتقادات الموجهة له بعد ما قال في منشور:"اركن شهادتك علي جنب وشمر واشتغل".
قال عمر كمال:" فيه رقم محطوط للحجوزات على الصفحة عشان الشغل والأفراح والحفلات، من أكتر المكالمات اللى بتيجى عاوزين شغل ومفيش شغل عندكم عشان إحنا محتاجين شغل" مضيفًا: "حاجة بتحسسنى بالحزن جدا لأنهم شباب في سنى فا بحب بين كل فترة والتانية أكتب بوست للناس فيه تشجيع وحافز إن خلى جواك إيمان بنفسك وأمل في ربنا وإن كل حاجة هتتعدل".
واستكمل: "أنا شاب أخدت دبلوم صنايع وكملت دراسة مزيكا ف معهد موسيقى العربية، ولما طلعت ملقتش فرصة أغنى ف الطرق العادية زى قصور الثقافة و الأوبرا وكده، فا قررت أعتمد على نفسى واشتغل كل حاجة.. وحرفيا شمرت واشتغلت ومشيت ف كل الطرق اللى توصلنى لهدفى"، موضحًا: "كتبت بوست من المنطلق ده اللى هوا شيل شهادتك على جمب لو مشتغلتش بيها وانزل و شمر وهات حلمك وهدفك وحققه.. وحطيت صورة لتكريمات وجوايز نتيجة لنجاحى ف مجالى وطبعا قصدى إن كل واحد ف مجاله يجتهد، إيه الغلط ف كده يا جماعة !".
