بعد الجدل على صورة «الجزمة».. أول تعليق من زوج ياسمين أبو النجا
كتب خضر محمد خضر، زوج الفنانة ياسمين أبو النجا، ابنة نجلاء فتحي، توضيحًا بشأن الصورة، التي أثارت الجدل علي السوشيال ميديا.
وقال على صفجته الشخصية بـ"فيسبوك": "بالنسبة للصورة بتاعتي أنا ومراتي، الصورة اتاخدت واحنا مروحين الساعة ١:٣٠ صباحاً من حفل الافتتاح (مش وإحنا داخلين حفل الافتتاح).. أكيد مش هدخل حفلة شايل جزمة مراتي وماشي!.. إحنا الدعوات بتاعتنا دعوات VIP مش دعوات مشاهير، فده أصلاً ما بيدخلناش على السجادة الحمراء مع الفنانين، ده بيدخلنا من باب تاني جنبه ما فيهوش كاميرات".
وأضاف: "كل ما هناك أن بعد ٦ ساعات من الحفل، وإحنا خارجين باب الخروج كان زحمة وكل الناس خارجه منه (فنانين وغير فنانين ومصورين وكاميرات فيديو).. ومراتي أكيد بعد ٦ ساعات رجلها تعبت زي أي واحدة رجلها بتتعب في أي فرح.. فقلعت الجزمة!".
وتابع: "من الطبيعي ومن الرجولة ومن الأدب إن انا اللي أنزل أجيب الجزمة.. ودي لا حاجة تعيبني ولا تقلل مني.. واحدة شايلة بيتي على راسها ١٥ سنة، مش هاشيل جزمتها ١٥ دقيقة..المهم ضربت بعيني لقيت ممر السجادة الحمرا مفتوح وفاضي قولت لها ياللا نخرج من هنا أسرع، ولقينا المصور العزيز محمد حامد، بيطلب مننا صورة فا وقفنا ٣ ثواني بالظبط.. ابتسمنا واخدنا الصورة وخلعنا.. والراجل تفضل مشكوراً وبعت لي الصورة على الفيسبوك وبصراحة الصورة لذيذة.. ولما حطيتها عندي على الوول لقيتها بيتعمل لها شير روحت قافلها (للاصدقاء فقط) بس كده".
