"يا تتحجبي يا تسكتى".. نهاد أبو القمصان تهاجم رضوى الشربينى
هاجمت المحامية نهاد أبو القمصان، المذيعة رضوى الشربينى بسبب ما قالته بأن المحجبة أفضل 100 مرة من غير المحجبة، وقال أبو القمصان فى رسالة لرضوى الشربينى على صفحتها الرسمية: "رضوى الشربينى يا تتحجبى يا تسكتى لأن اللى بتقوليه دا عنف ضد غير المحجبات وجريمة".
وأضافت: "ركوب الترند أو خلق الترند للشهرة بقى حرفة وصنعة ليها خبراء والحقيقة رضوى الشربينى من يوم ظهورها وهى محترفة فى دا.. من أول ظهور برنامج موضة على قناة طبخ واستخدام قضية المراة والراجل بشكل بدائى سطحى باعتباره صراع مع الرجل.. نظرية بدائية خلصت من ١٠٠ سنة".
واستكملت: "يبدو أن رضوى محتاجة كام مليون مشاهدة تانى فدخلت فى ترند الحجاب وأن المحجبة أحسن واللى مش محجبة شيطانها ركابها".
وتابعت: "عايزة تتحجبى اتفضلى ولو إنك مش هتعمليها، بترسمى على جمهور الجماعات الإسلامية والإخوان علشان تنافسى الشيخ إياه على المشاهدة وماله ، كله تجارة.. إنتى شيطانك تعبك ؟ دى قضيتك الشخصية مالك بقى باللى مش محجبة شيطان أيه وزفت أيه".
وأختتمت: "نصيحة.. لما تبقى فى زمن الترند وتقدمى نفسك باعتبارك مدافعه عن الستات ما ينفعش تطلعى تقولى كلام يحرض على العنف ضد الستات الشاشة مش مكان لرسائل مخفية لحد بعينه".
