زوجة أحمد فتحي بعد تعافيها من كورونا: "لو حد محتاج مساعدة يكلمني ومستعدة أتبرع بالبلازما"
كشفت نورا إسماعيل، زوجة أحمد فتحي لاعب الأهلي، المنتقل إلى نادي بيراميدز بنهاية الموسم الجاري، تفاصيل إصابتها هي وبناتها الثلاث مؤخراً، بفيروس كورونا المستجد "كوفيد 19".
كتبت زوجة فتحي عبر حسابها الرسمي على موقع التواصل الاجتماعي "فيس بوك": "الحمد لله رب العالمين على نعمة الصحة بشكر كل الناس حبايبي اللي اطمنوا عليًا بأي طريقة وآسفة جدًا إني مكنتش ملاحقة على التليفون ولا الرسايل لأني كنت في ابتلاء شديد ربنا ما يكتبها على حد".
تابعت: "القلق إنك مسؤول عن كل اللي حواليك وبيتقالك انزل شوف مستشفى وأنا بنتي كانت تعبانة جدا، وماما وبابا كنت خايفة عليهم جدًا، لأني كنت بشوفهم كل يوم تقريبا، كان عندي إحساس مسيطر عليا إني هموت وإحساس بالذنب أني أكون عديت حد حوليا، وما بين دكاترة عايزه تساعد ودكاترة مش عايزه تجازف وتشوفنا عشان خايفين وده حقهم طبعًا ومعامل تطلع نتايج كويسة ونتايج وحشة".
وأضافت: "النصيحة بقى مني إن أنا كنت بعمل كل حاجة صح ماعدا إني ألبس mask وأنا مع قرايبي وأصحابي القريبين، وكنت بلبسه وأنا خارجة من البيت بس، لازم كل الناس تلبس mask مع أي حد وفي أي مكان حتى لو في البيت، وكمان غسل الايدين كل شوية والأكل الصحي والشمس والنفسية تكون كويسة لآن أنا وجوزي كنا هنموت من الخوف رغم إننا مؤمنين بالله وقدره".
واستطردت زوجة لاعب القلعة الحمراء؛ "لو حد شك أن عنده ما يقلقشي خالص ولا يروح يعمل مسحة ولا أي حاجة يتعالج في البيت ويعزل نفسه أسبوعين مع الڤيتامينات والأدوية وان شاء الله هيبقى زي الفل، ولو حس بوجع في الصدر يعمل إشاعة CT ولو حد عايز اي استفسار أو مساعدة يتواصل معايا من غير تردد، وأنا كمان ممكن اتبرع بالبلازما بتاعتي لأي حد، وربنا يخليكوا ليا أنا، عرفت أنا غالية عند الناس كلها، ربنا يحفظكوا جميعا بحبكوا أوي أوي".
