"فكرت أصور وصيتي".. كريم قاسم يروي تجربته مع كورونا: "كنت خايف أموت لوحدي"
تصدر الفنان كريم قاسم تريند "تويتر" عقب إعلانه إصابته بـكوفيد ١٩ "فيروس كورونا"، مؤكدا أن بدأ يتعافى تدريجيا.
وقال قاسم في فيديو بثه على حسابه الشخصي على "انستجرام" إنه أصيب بفيروس كورونا منذ 3 أسابيع، وقرر الحديث عن الأعراض التى ظهرت عليه وكيف تعامل مع الفيروس.
وأضاف: "عرفت بكورونا فى شهر 3 وعايش مع والدي لوحدنا عنده 79 سنة اترعبت وكنت خايف عليه وسبت البيت عشان كنت بنزل اشتغل وعندى التزامات مكنش ينفع أوقف شغل خلصت تصوير آخر أبريل يوم 17 و18 مايو ظهر علي أعراض كورونا وأول حاجة ظهرت صداع جامد حرارة تكسير في العظام جامد جدا".
واستكمل: "بعد 12 ساعة ما ظهرت الأعراض كلمت كل اللي قابلتهم في آخر 14 يوما للاطمئنان على نفسهم، رابع وخامس يوم كنت بموت وفقدت حاسه التذوق وكنت هعمل فيديو الوصية وباخد بالي من نفسى لوحدي وصعبت عليا نفسي وكنت خايف أموت لوحدي ويكسروا عليا باب الشقة، سادس وسابع يوم بدأت أتحسن".
واسطرد قائلا: "بعمل الفيديو ده ليه عشان الناس اللي جالها كورونا واللي هيجلها كورونا، يمكن شهادتي تفيد ناس كتيرة عندك أعراض كحة خفيفة إسهال ترجيع صداع خليك في البيت وعالج نفسك متخدش مكان حد محتاج مكان فى المستشفى، الموضوع مش سهل ولا بسيط ولا هزار الموضوع جد مش دور برد وخلاص لو حد كلمك وقالك أنه جاله أعراض كورونا اسمعه كويس متستهرش بكلامه، ولو اتعملنا بوعي الموضوع هيعدى".
