رسالة مؤثرة لنائب مدير مستشفى " النجيلة"عقب إصابته بكورونا:شرف لكل طبيب

كشف الدكتور محمد علام، نائب مدير مستشفى النجلية فى مطروح، عن إصابته مؤخرا بفيروس كورونا ومرض "كوفيد 19"، مؤكدا أن حالته تحسنت كثيرا بعد مروره مرحلة الخطر.

وحكى علام فى منشور له على صفحته الشخصية بموقع التواصل الاجتماعى فيس بوك، تجربة إصابته وتعافيه وقال :

"صباح الخير عليكم وكل أيامكم بخير

 ناس كتير انتقدت أن الفتره اللي فاتت وقت كتير بقضيه علي فيس في بوستات توعيه وردود على الناس وبتسأل امال فين شغلك ومضيع وقتك.

للأسف في حاجه مكنتش حابب اتكلم فيها دلوقت عشان مبقاش سبب ذعر وقلق للناس اللي بطمنهم باستمرار ولانها حاجه متوقعه لكل طبيب وكل لما الفتره تطول فرصه حدوثها بتزيد لكن فى ناس ظلمانى ولازم أوضحلهم حاجه مهمه وانا مش زعلان منهم على فكره

بس الحمد لله اتشخصت كوفيد ١٩ ايجابي من يوم ٦-٤ انا كنت عارف من اول يوم إنى معرض لكده وراضي ده شغلى وانا مش زعلان ولا كنت خايف والحمد لله هتكمل على خير وحالتى اتحسنت كتيير وإن شاء الله قريب اتحول سلبى واروح".

دي الحقيقه اللي كنت مخبيها باختيارى انا اللى طلبت محدش يعرف عشان أهلي ميقلقوش اللي بيعدو الأيام وهما عارفين اللي انا فيه وأسف إنى اتأخرت كل ده محبتش اعرفهم غير لما أكون بقيت كويس.

وأسف للناس اللي بطمنها باستمرار انى مقلتلكمش بس إن شاء الله هتعدي التزموا باللى بننصح بيه اللى حصل ده وارد لأي طبيب ولا يلام عليه أحد نهائيا ومش معرض ليه أى واحد ملتزم فى بيته أو فى الشارع ده بسبب إجراءات طبييه معينه وكلنا عارفين الخطر اللى احنا فيه وراضيين وده حسابه عند ربنا مش عاوزين حساب من بشر فيه ده واجبنا أولا وأخيرا وشرف ما بعده شرف لكل طبيب.

بشكر كل زميل ليا دكتور أو تمريض أو عامل وقف جمبي في الظروف دى عمرى مهنسالكم اللى عملتوه.

وبشكر كل واحد كتب كلمه حلوه فى حقى على البوستات انا اسف كنت بستغلكم انى اخد منكم طاقه ايجابيه اعدى بيها الفتره دي والحمد لله كلامكم كان ليه مفعول سحر الدعم النفسي شئ رائع.

المرض حقيقى وأعراضه حقيقيه والناس بتخف حقيقى رجاءا ركزوا فى اللى تقدروا تعملوه وهتعدى.

والله العظيم بتعدى لو التزمنا مرحله الخطر عندى عدت وانا دلوقت فى مرحله الشفاء التام وان شاء الله ايام واروح بيتى اجازه صغيره وهتبدء الخناقه مع زوجتى واهلى علشان ارجع تانى

((توضيح مهم جدا جدا دى مش بطوله ده شغلى وواجبى والله العظيم فى دكاتره وتمريض وناس كتيير فى الصحه فى الخطر ده من أول يوم واصابوا اللى حصل وارد بنسبه بسيطه فى العالم كله وحصل لكل اطباء العالم عادى وكل دكاتره مصر ومقدمى الخدمة الصحيه مكملين ويقدروا بيكم يعدوا البلد من المحنه دى))