بعد تعاطف السوشيال معه.. القصة الكاملة لإصابة رامي جمال بالبهاق
تعاطف رواد "السوشيال ميديا" مع إعلان المطرب رامي جمال إصابته بمرض البهاق.
المطرب كتب عبر حسابه الشخصي بموقع تبادل الصور والفيديوهات "إنستجرام": "الحمد لله الذي أحبني فابتلاني وأقدرني على الصبر.. من فترة ظهرت بقع بيضاء في جسمي وبالكشف عرفت إنه مرض البهاق، وجربت أنواع علاج كتير ودكاترة كتير ومفيش فايدة".
وتابع رامي قائلا: "رضيت وسلمت أمرى لله عشان عرفت إن الزعل بيزوده وكفاية شغلانتي وصعوبتها والقلق الدائم من المستقبل، وفعلا بقى بيزيد لدرجة لفتت نظر ناس كتير، اللي بقى يقولي هتتعامل إزاي وأنت فنان واللي يخاف يسلم عليا واللي يسألني هو ده معدي".
وأضاف: "أنا بقالي سنة فعلا لو عندي حفلة أو تصوير بتعب على ما أشوف طريقة أخفيه بيها، لدرجة خلت ناس تقولي شوف بيزنس تاني أعمله عشان الناس مش هتقبلك كده، وفكرت في كلامهم بصراحة".
واختتم رامي حديثه: "لقيت إن عندي حلين يا فعلا شكرا لحد كده على الشغلانة دي رغم حبي ليها وعدم معرفتي بغيرها، يا إما مش هداريه تاني وتقبلوني بيه وترحموا كل اللي ربنا ابتلاهم بيه من نظرة أن شكله غريب، والحمد لله على نعمة الأهل لأنهم الوحيدين اللي بيقبلوا الواحد زي ما هو".
في السياق، قدم الدكتور هاني الناظر استشاري الجلدية ورئيس المركز القومي للبحوث "سابقا" بعض النصائح حول هذا المرض.
قال إن مرض البهاق هو مرض ناتج عن نشاط زائد في الجهاز المناعي، وهو مرض غير معدٍ، ولم يثبت علميا ان له أسبابا وراثية، وأكد أن ما يؤلم مصابون مرضي البهاق هو نظرة المجتمع لهم حيث يصابون بفقدان الثقة والاكتئاب.
وقال هانى الناظر خلال تصريحات له أن علاج البهاق يتضمن أكثر من طريقة للعلاج، الطريقة الاولى من خلال الأشعة فوق البنفسيجية التى نعرض المريض لها.
بالاضافة إلى أنه تم اكتشاف علاج جديد وفعال لمرضى البهاق بعد الأبحاث التى أجراها المركز القومى للبحوث، ويعتمد على دواء مناعى مع مجموعة من الفيتامينات ويتناوله المريض لمدة من 4 إلى 6 أشهر ونتائجة فعاله جدا، وعادة لا يعود مرة أخرى للمريض.
