أحمد موسى يكشف مفاجأة عن بعض المسلسلات الرمضانية: "مشاهد لم تعرض على الرقابة"
أكد الإعلامي أحمد موسى أن هناك بعض المسلسلات التي تم تصوير مشاهد فيها غير موجودة في السيناريو الذي عرض على الرقابة.
وقال موسى خلال برنامج "على مسؤوليتي" المذاع على قناة "صدى البلد": "المشكلة أصلها أنه في سيناريو بيتكتب وعندنا رقابة على المصنفات وهي جهة مهمة جدا في الدولة لأنه هو بيشوف السيناريو المكتوب ومن المفترض يشوف الكلام المكتوب هل تم تصويره بالظبط وتقديمه زي ما هو مكتوب ولا تم تغييره".
وأضاف: "في بعض الأحيان وفي شهر رمضان اللي حصل السنادي أنه حاجات اتكتبت وتم تمثيل مشاهد ليست موجودة في السيناريو وأنا بقولكم معلومات، وحقائق في مشاهد تم تصويرها ولم تراها الرقابة".
وتابع: "اتقال إنه زي ما بيقولوا كده بيعملك الأول خمس ستة سبعة أيام وباقي الشهر بيعمل يوم بيوم ويصور يوم بيوم ودا بيؤدي لأنه مبتعرفش هتشوف 40 مسلسل ازاي وتراجعهم ازاي؟ الرقيب لما بيدخل بيدخل في حاجات أنه لا يمكن مثلا حاجات تؤدي لاثارة معينة داخل المجتمع وهنا عين الرقيب يقدر يشوف ده تأثيره أيه على الأرض، طيب المشهد ده لو اتعرض والألفاظ دي لو اتقالت هل يليق أنها تدخل بيوتنا ولا لأ".
وأوضح: "هنا دور الرقيب هو ليه علاقة بالحفاظ على الذوق العام وفي مشاهد كتيرة جدا في مسلسلات اللي سببت استياء من حضراتكم واللي وصلت للرئيس عبد الفتاح السيسي، الرئيس شايف ومتابع وبيتعرض عليه تقارير الرأي العام والبيوت المصرية زعلانة من ايه؟ كل ده واصل للرئيس".
واختتم: "الرأي العام كان في حالة ونبض الشارع المصري وفي أشقاء عرب بالمناسبة كانوا مضايقين جدا من بعض المسلسلات اللي موجودة والتي تقدم صورة غير واقعية عن مصر، هما نفسهم زعلانين".
