أحمد شوبير يسخر من الحضري: "نعمله مقام سيدي الإسطورة"

أكد الإعلامي أحمد شوبير أن علاقته بالراحل ثابت البطل حارس الأهلي السابق كانت جيدة، مشيرا إلى أنه توفي وعلاقتهما متميزة.

وقال شوبير في مقابلة مع برنامج "أسرار" المذاع على قناة "النهار": "الكابتن ثابت الله يرحمه كان في منافسة حراس المرمى الطبيعية ولما اعتزل بقي مدير كرة واستمرت المنافسة منه شوية ولكن في النهاية انتهي تماما والكابتن ثابت توفي وأنا من أقرب الناس إليه، ومازالت علاقتي بأسرته أكتر من رائعة حصل نوع من أنواع الخلاف طبيعي جدا بيحصل وأنا قبل وفاته بسنتين كانت علاقتنا فوق الوصف".

وأضاف: "ثابت البطل وإكرامي أساتذتي واللي علموني وإكرامي حبيبي وليه دور كبير جدا في حياتي وأي حد له ربع فضل عليا لازم أشيله فوق دماغي ودا كان كابتني ومدربي ومثلي الأعلى".

وتابع: "الحضري عنده مشكلة في حياته لازم تطلع تقول الحضري الحضري، وممكن نعمل ليلة ذكر للحضري وتعمل مقام باسم سيدي الحضري وميعجبوش أنك تقول أفضل حارس".

وأوضح: "أنا لما بتكلم على الحضري لازم أديله حقه تالت ومتلت لأنه حقق إنجازات ولكن نعمله إيه تاني بقى؟ هو عنده مشكلة معايا الطبيعي أن أنا اللي أكون مضايق منك اللي بيبطل واحد أبقى زعلان من اللي بطلني، ولكن هو مبطلنيش أنا اتصابت ورجعت ومقدرتش أني العب".

وأكمل: "أنا قعدت احتياطي للحضري مباراة واحدة فقط وبعد ما سافرت للعلاج ورجعت كان في اتجاه داخل النادي إني ملعبش، كان عندي 37 سنة قلت حلو كده أخرج من الباب الكبير وعملت مباراة اعتزال حلوة وعمري ما اتكلمت عنه أو عن حد من الزملاء إلا بكل احترام وتقدير".

وذكر: "الحضري عنده مشكلة الناس بتكلم أحيانا عن شوبير وبعدين طلع شوبير الصغير، هنعمل مقام للحضري مقام سيدي الأسطورة شوفت صلاح بيقول على نفسه أسطورة؟".