إيناس الدغيدي ترد على ميار الببلاوي: لا كانت ممثلة ولا حد يعرفها

ردت المخرجة إيناس الدغيدي على تصريحات الفنانة ميار الببلاوي والتي أشارت إلى أنها أجبرتها على تقديم مشاهد تحتوي على طعام وشراب خلال شهر رمضان أثناء تصوير فيلم "ديسكو ديسكو" الذي قامت الدغيدي بإخراجه.

وقالت الدغيدي في مقابلة مع برنامج "العرافة" المذاع على قناة "النهار": "في 10% من الناس اللي اشتغلوا معايا مش بيحبوني، وفي ناس بتبقي عايزة تعمل معايا مشكلة عشان تكبر وتعمل راسها براسي عشان تثبت أنها موجودة في المجتمع".

وأضاف: "في واحدة قالولي عليها قريب وهي ميار الببلاوي، وهذه الكائنة لما عملت ديسكو ديسكو مكانش ليها أي وجود على الساحة لا ممثلة ولا معروفة وكانت تتمني وأنا كنت جايبة مجموعة شباب جداد بيعملوا فيلم ديسكو ديسكو وأخد 6-7 جوايز وفيلم كان بيتكلم عن الشباب والمخدرات".

وتابع: "اللي يدخل يشتغل ميقعدش يقولي أنا صايم أنا بصلي، يصلي لوحده يصوم لوحده والادعاء دايما أني بعمل الدين وأني صاحب الدين مينفعش، أنا مش فاكرة ولا متذكره اللي قالته لأني مش متذكراها أساسا ومش متذكره هي كانت بتعمل إيه".

وأوضحت: "لما أشوف ممثلة بتحاسب واحد صام وواحد فطر، دي طلعت مرة بتقول إنها دعت عليا في الكعبة أن ربنا يعمل فيا إيه وطلعت قالت إني خليتها أعمل مشهد غصب عنها غصب عنك يعني إيه مش في سيناريو وقريتيه؟ دي مش بتهاجمني دي بتتهمني".