مصطفى بكري يعلق على تصريحات رئيس أركان جيش الاحتلال: "إحنا لحمنا مر"
أكد الإعلامي مصطفى بكري أن تصريحات رئيس أركان الجيش الإسرائيلي بشأن الجيش المصري تحمل رسالة، مشيرا إلى أن التصريحات صادرة عن مسؤول وليست كلاما في وسائل الإعلام.
وقال بكري خلال برنامج "حقائق وأسرار" المذاع على قناة "صدى البلد": "الأيام تكشف كثيرا من المواقف وتحمل كثيرا من المفاجآت، شوفنا الأيام اللي فاتت وتابعنا الحملة الإعلامية الإسرائيلية على مصر وعلى الجيش المصري وكلها ادعاءات الهدف منها التحريض".
وأضاف: "لما يطلع رئيس الأركان الإسرائيلي هاليفي يقول إن مصر عندها جيش قوي وبقدرات عالية ونحن قلقون لأن ذلك قد ينقلب في أي لحظة دا كلام رئيس الأركان الإسرائيلي مش كلام الصحافة ولا كلام حد سياسي دي رسالة".
وتابع: "انتوا ياللي في مصر بتعملوا إيه الجيش القوي دا مجهزينه لمين؟ إحنا قلقين ونتوقع أي حاجة في أي وقت يعني لازم نستعد وبعضهم قال لازم نعمل ضربة استباقية زي ما انتوا شوفتوا وقالوا لازم نستبق الحدث حتى لا نفاجأ بطوفان اقصى جديد".
وأوضح: "الكلام ده مش كلام فاضي دا رئيس الأركان الإسرائيلي عشان كده لازم نتوقف ونقف ونقول انتوا عايزين ايه بالظبط؟ وايه معني أن رئيس الأركان الإسرائيلي هو اللي يقول الكلام ده".
وأكمل: "رئيس الأركان الإسرائيلي بيقول في الكلمة اللي ألقاها أمام خريجي ضباط الجيش في منطقة حولون بالكيان الصهيوني بيقول إن دولة إسرائيل تشعر بالقلق من التهديد الأمني القادم من مصر، وتعتقد أنه ليس تهديدا في الوقت الراهن ولكنه قد يتغير في أي لحظة وبيقول نحن قلقون للغاية فمصر لديها جيش كبير مزود بأسلحة متطورة".
وأوضح: "خلوا بالكم يا مصريين الكلام ده بيحمل رسائل مش كلام وبس وعايز أفكركم بتصريح مندوب إسرائيل في الأمم المتحدة لما قال إن إسرائيل لديها مخاوف كثيرة بشأن الجيش المصري".
واختتم: "أوعوا تفتكروا أننا ناس نايمين على عنينا إحنا فاهمين انتوا بتفكروا إزاي وفاهمين عقيدتكم بتقول إيه وعارفين كويس أوي كيف تضمرون الشر للمنطقة، بس إحنا لحمنا مر إحنا شعب مصري مرتبط بأرضه وجيش وطني مبيهددش حد ولكن بيحمي حدود بلده".
