أحمد موسى: القادم على المنطقة صعب.. ويا إحنا يا العالم كله يدفع التمن
أكد الإعلامي أحمد موسى أن تصريحات الرئيس الأمريكي دونالد ترامب تشير إلى أن القادم على المنطقة أسوأ مما يتخيله أي شخص.
وقال موسى خلال برنامج "على مسؤوليتي" المذاع على قناة "صدى البلد": "الأمور مطتمنش على مستوى المنطقة وأي أمر متوقع لأبعد خيالكم، ونتنياهو كان يتحدث في الكنيست وكنت أتابع كلمته وهو جاء بضوء أخضر من ترامب هيعمل كل حاجة عايزينها ومفيش حاجة هتوقف مجرم الحرب نتنياهو".
وأضاف: "مفيش دولة فلسطينية جاية لا بكرة ولا بعده وفي إطار الموجود ده لا دولة فلسطينية قادمة ولو فضل سكان غزة في غزة يبقى ربنا كرمنا كرم كبير، ترامب بيقولك هشتريها هيشتري غزة إحنا بنتكلم في مخطط مكانش في خيال ولا واحد".
وتابع: "ترامب عنده مخطط بالمناسبة مش غزة بس عشان بس الناس تفضل كده تقولك هنعمل، نخلي بالنا من اللي جاي وأنا بتكلم على ما بعد غزة وما بعد غزة ونبقى شايفين الحكاية أبعد من غزة عشان كده لازم نخلي بالنا كويس أوي لأن القادم صعب جدا على المنطقة بالكامل وعلى جميع الدول العربية أما العالم العربي يبقى حتة واحدة أو محدش هينجو من مخطط ترامب – نتنياهو".
وواصل: "دا يتطلب الموقف العربي الواحد واللي مفيش تاني بعديه ويا إحنا يا كل العالم كله يدفع التمن بما فيها أمريكا تدفع التمن، وأنا بتكلم بمنتهى الحدة لأن اللي شفته من خطاب نتنياهو وكلام ترامب بيقول القادم أسوأ من أي خيال أي واحد".
وأوضح: "يا إما كلنا نبقى مع بعض يا إما في مشكلة كبيرة جدا تواجه العالم العربي كله محدش بعيد والمخطط ضخم جدا وهيكون على أراضينا مش على أراضي غيرنا، وهو بيتكلم بشكل واضح بيتكلم كرجل أعمال كواحد بتاع عقارات كواحد مطور عقاري".
واختتم: "ترامب كلامه كمطور عقاري بيقولك أنا هاخد الحتة دي من إمتى في رؤساء دول بيتكلموا بهذه الطريقة؟ دا بيقولك كمان مفيش حق عودة الفلسطينيين دول هيمشوا ومش هيرجعوا".
