تامر أمين: بيان وكيلة مدرسة التجمع لا يليق بسيدة تربوية
أكد الإعلامي تامر أمين، أن المنشور الذي كتبته وكيلة مدرسة التجمع لا يليق بسيدة تربوية، مشيرا إلى أن السيدة هاجمت الوزير وحولت القضية إلى موضوع شخصي.
وقال أمين خلال برنامج "آخر النهار" المذاع على قناة "النهار": "مفاجأة صادمة ومن العيال الثقيل فيما يتعلق بواقعة ضرب فتاة مدرسة التجمع، خلاص كلنا اعتقدنا أن الأمور خلصت امبارح والتحقيقات هتاخد مجراها بأن النيابة أخلت سبيل البنات المعتديات والبنت المعتدي عليها خرجت من المستشفى وروحت البيت وقولنا إن الموضوع هيمشي في مساره".
وأضاف: "إمبارح بيان وزارة التربية والتعليم قررت خضوع المدرسة للاشراف المالي والإداري من وزارة التربية والتعليم ولكن فوجئنا النهاردة ببيان نزلته السيدة نرمين محمد وكيلة مدرسة كابيتال اللي حصلت فيها المشاجرة بين البنات".
وتابع: "نزلت البيان ومفيش ساعة وقامت بحذفه مش عايز أقرأ البيان كله لأنه مسيء والبيان بتتكلم فيه الأستاذة نرمين عن بعض احداث الواقعة وبتقول من وجهة نظرها أن القصة تعدي من الطرفين وأن التعدي اللفظي كان من الطرفين ولكن مش ده المهم في القصة".
وواصل: "المهم في القصة الهجوم الحاد والضاري اللي شنته على السيد محمد عبد اللطيف وزير التربية والتعليم واتهمته أن دي تصفية حسابات وأن قرار وضع المدرسة تحت الاشراف المالي والإداري غير مظبوط وانه بينتقم من المدرسة من وجهة نظرها عشان المدرسة بتنافس المدرسة اللي تتبع لعائلة السيد وزير التربية والتعليم وقامت مستخدمة لفظ أنا مش عارف ازاي يصدر عن سيدة تربوية".
وأوضح: "كيلة المدرسة المفروض تبقي سيدة تربوية تعليمية من المقام الأول وقالتله مكنتش أعرف ان مدرستنا حرقاك كده، على فكرة طبيعي أبقى وكيلة مدرسة وأدافع عن مدرستي حقها، ولو طلعت بيان تقول إحنا مدرسة كويسة وهنتظلم من القرار ولكن مش من الصح أبدا أني أشخصن الموضوع واتكلم أن الوزير مستني غلطة للمدرسة عشان يصفي الحسابات".
واختتم: "شيء في منتهي الغرابة ثم أن سيدة تربوية زي كده بتستخدم مصطلح حرقاك يا كذا وواضح ان زملائنا نصحوها بحذف البيان ولكن كانت الكارثة وقعت".
