عمرو أديب: فرصة إصلاح الدولة موجودة وإحنا مش على الحرف
أكد الإعلامي عمرو أديب أن هناك فرصة أمام الدولة المصرية من أجل إصلاح الأوضاع الداخلية، مشيرا إلى أن المواطن لا يشعر بكثير من الرضا.
وقال أديب خلال برنامج "الحكاية" المذاع على قناة "إم بي سي مصر": "مستوى رضا المواطن المصري ليس عاليا، هل الحالة اللي بيحاولوا ينقلوهالك واللي بيعمل الحالة دي معلمين يعني هو عايز يوصلك لقناعة أنك في النهاية وهما مش فاهمين حاجة أن العقدة المصرية النفسية لطريقة تغيير المجتمعات هي السبب اللي ممكن تخلي المصريين متغيرش المصري يقولك أنا مش عايز الدنيا تتنيل".
وأضاف: "مازال هناك فرصة قوية لهذا البلد للتغيير والإصلاح هذا بلد قابل ومازال للتغيير والإصلاح، وإذا كان في السنوات الماضية كان عندك أشياء مضطر تقبلها فليكن هذا العام أن يتم التغيير والإصلاح وأن تجد الطريق اللي يخلي الشعب ده يقبل بشكل واضح أنه يحافظ على مجتمعه".
وتابع: "إحنا مش على الحرف هو بيحاول يقولك إحنا خلاص وبيكرهك في جيشك وشرطتك ولكن أنت مازلت قادر على الاستمرار وخلاص كان في ظروف وأشياء مضطرين نعملها لأسباب".
وواصل: "عندما يشعر الانسان أن هناك طريق للتغيير والتعبير هو اللي حصل إيه عند بشار؟ أنه خلى الناس تشعر أن خلاص مفيش فايدة وأنت في مصر مازال عندك الفرصة أنك تجعل الناس إحساس بالأمل".
وأوضح: "في أمل كبير جدا أن الأمور تتنفس شوية مش كتير ويجب أن يشعر الإنسان أنه قادر على التعبير ويطلع اللي جواه ويكون فاعل في أحزاب حقيقة في مجلس نواب، حقيقي في اتحاد طلبة حقيقي ويبدأ الناس في التعبير عن نفسها".
وأكمل: "مصر مش الـ 100 ألف الموجودين على تويتر، مصر 100 مليون، وخد الناس معاك والسنادي عندك برلمان بقى، الانتخابات اللي فاتت كان ليها شكل معين تحت أمرك انما الأن دع 100 مليون زهرة تتفتح بقي".
وأوضح: "عندنا فرصة لسه وأنا اليوم أقف مع الدولة المصرية وأتحدث عن الدولة المصرية أنت مش قليل ومازال ليك تأثيرك ووجودك في الإقليم".
واختتم: "اسأل أي إنسان في مصر هل هناك ضوء في آخر النفق؟ هو دا اللي لازم يبان يبان إزاي سياسيا وأمبارح والنهاردة وبكرة في محاسبة لناس كانت انحرفت وريني الضوء والأمل بيخلي الشعوب تمضي لسنوات، واليأس يقضى تماما على حراك الشعوب في ظروف داخلية وأخطاء وضغوط كل ده تمام ولكن المصريين هم رأس مال مصر".
