مصطفى بكري يطالب رئيس الوزراء بتوضيح تصريحاته بشأن الدولار

طالب الإعلامي مصطفى بكري رئيس الوزراء الدكتور مصطفى مدبولي بتوضيح تصريحاته الأخيرة حول زيادة الدولار.

وقال بكري خلال برنامج "حقائق وأسرار" المذاع على قناة "صدى البلد": "لازم يبقى عندنا خطاب إعلامي مقنع يعني امبارح السيد رئيس الوزراء قال متقلقوش إذا الدولار اتحرك والتصريح ده عمل ضجة من امبارح كبيرة جدا وأنا بتمنى من السيد رئيس الوزراء أنه يطلع يوضح المسألة بشكل يطمئن الناس لأن في ناس من امبارح تقولك مش هودي دولار منقلقش الناس".

وأضاف: "أتمنى من السيد رئيس الوزراء يطلع يوضح لنا هذا الكلام لأن الكلام عامل رد فعل عكسي شديد ومن امبارح الناس بتتكلم والدولار هيوصل 60 و70 والكلام غير منطقي احنا خدنا من البداية واتفقنا أن السعر هيبقي مرن".

وتابع: "نتمنى بالفعل أن الدولار ينزل ميطلعش لأن كل ما بيطلع قرش بينعكس على الأسعار والحاجة التانية مش هنسيب الرئيس يتكلم لوحده أو يدافع لوحده واشتكى من الإعلام ومن غيره أكثر من مرة أنا سؤالي الواضح والصريح احنا في حرب ومشاكل وأزمات وعندي 7-8 برامج توك شو واقفة حد يفسرلي ليه البرامج واقفه رغم أن برنامجنا منافس ولكن يهمني البلد".

وواصل: "احنا محتاجين برامج التوك شو تبقى موجود والناس تطلع تتكلم والمسؤول اللي يتكلم يطلع ويقول بالأدلة المقنعة يعني مثلا موضوع قوائم الإرهاب كنت أتمنى المسؤولين يطلعوا ونعمل مؤتمر صحفي عالمي".

وأكمل: "توضيح الحقائق للشعب بيسد الباب أمام الخونة والمتأمرين اللي عايزين البلد دي تقع أنتوا شايفين اللي بيحصل في سوريا وشوفتوا اللي بيحصل في لبنان واللي بيحصل في فلسطين وبكرة العراق والمخطط كبير ومش مهم فلان ولا علان ولكن أدوات بتتحرك وقوي كبرى بتحرك مجموعات متأمرة هنا وهنا".

واختتم: "اوعوا تفتكروا أنهم لو خلصوا على دول الجوار هيسيبونا قلتلكم الإسرائيليين بيقولوا إيه في إعلامهم وهاجسهم دلوقت الجيش المصري".