بالأسماء.. مصطفى بكري يوضح أسباب إزالة بعض عناصر الإخوان من قوائم الإرهاب

كشف الإعلامي مصطفى بكري عن أسباب إزالة عدد من عناصر جماعة الإخوان الإرهابية من قوائم الإرهاب.

وقال بكري خلال برنامج "حقائق وأسرار" المذاع على قناة "صدى البلد": "وجدي غنيم ويحيى حامد وآخرين موجودين في الخارج وليس داخل مصر والرفع من الإدراج في قائمة الكيانات الإرهابية لا يعني الإفراج عن أي منهم من السجون خاصة إذا كان محكوم عليهم أو يخضعون للتحقيقات يعني المسجون يفضل مسجون والمطلوب يفضل مطلوب".

وأضاف: "وجدي غنيم لو وصل مطار القاهرة هيتقبض عليه لأن محكمة جنايات القاهرة أصدرت حكم عام 2017 يقضي بإعدامه شنقا بتهمة تأسيس خلية وجدي غنيم وصدر ضده حكم بالسجن لمدة سنة مع الشغل بتهمة صفع طفل بميدان رمسيس عقب مظاهرات 30 يونيو".

وتابع: "لو جه مطار القاهرة هيتقبض عليه والسؤال لما هو عليه الأحكام دي ليه بتشيلوه من القوائم؟ في حاجة اسمها قوائم مؤقتة وفي حاجة اسمها قوائم نهائية وعشان الجهات القضائية تمنع الازدواجية لازم تشيله من القوائم المؤقتة".

وأوضح: "وجدي غنيم مدرج على القوائم النهائية وعنده حكم لازم ينفذه ومازال مدرجا في القوائم النهائية يعني مفيش حاجة حصلت لا طلع ولا اتبرأ وأنا بقول كلام أنا مسؤول عنه".

وواصل: "واحد زي جهاز عصام الحداد طلعتوه ليه؟ جهاد تم إلقاء القبض عليه في 17 سبتمبر 2013 واتحكم ببراءته في 11 سبتمبر 2019 من محكمة جنايات القاهرة وأفرج عنه في 16 أغسطس 2022 وقضى تسع سنين وسبق له أن كتب مقالا في نيويورك تايمز لقد تجاهلنا الاحتجاجات الشعبية وأكيد كنا على خطأ ونعارض استخدام القوة وطالب أبوه بالاعتذار عشان يطلع".

وأكمل: "إبراهيم الدراوي دا صحفي اتسجن 6 سنوات ثم أفرج عنه وأعلن إدانته للجماعة الإرهابية وبيمارس عمله وفي ناس توفيت زي يوسف القرضاوي وعبد الله ابن محمد مرسي، ممكن نلخص الموضوع في الأربع فئات الموجودة الفئة الأولى كل من حكم عليه حكم نهائي دا مدرج في القوائم الإرهابية والإرهابيين بشكل نهائي ولا يجوز استبعاده وكل ما تم بالنسبة لوجدي غنيم أنه اتشال من القوائم المؤقتة وبقي اسمه في القوائم النهاية".

وذكر: "طلع من القائمة المؤقتة عشان ميبقاش في ازدواجية ولازم لما ييجي مطار القاهرة يتم القبض عليه يعني مفيش جديد وفي فئة تانية اللي اتوفوا ولازم يتم استبعادهم بسبب الوفاة، هناك أشخاص عاديين لم يثبت عليهم ارتكاب جرائم جنائية وبعضهم راجع موقفه والتحريات أثبتت أن سلوكه أصبح قويما والقضية دي متعلقة بالأموال مش بالإفراج الإفراج ممكن يتم بالعفو الرئاسي أو ميتمش".

واختتم: "الفئة التالتة هي الفئة اللي حصلت على البراءة النهائية في قضايا نهائية والفئة الرابعة اللي هما 808 ويتم مراجعة موقفهم وهيصدر القرار بشأنهم في نهاية ديسمبر القادم بعد ما يتحولوا في محكمة الجنايات".