تامر أمين: رحيل اتحاد الكرة نعمة وفضل.. وأرجو منشوفش حد منهم تاني
أكد الإعلامي تامر أمين، أن مجلس إدارة اتحاد الكرة يحتاج أن يتكون من إداريين وليسوا لاعبين سابقين لديهم خبرات في كرة القدم.
وقال أمين برنامج "آخر النهار" المذاع على قناة "النهار": "المفروض النهاردة كان اليوم الأول لتلقي طلبات الترشح لرئاسة الاتحاد وفي اليوم الأول لم يترشح أحد هل ده له معني؟ لا ملوش معنى أوي لأن لسة في ناس بتفكر وناس لسة بتجهز ورقها وفي ناس لسة بتعمل مشاورات حوالين الفريق اللي هيبقى معاها لأن أي رئيس بيترشح لرئاسة مجلس إدارة الاتحاد لازم يبقي معاه مجموعة كاملة".
وأضاف: "وفي ناس كمان عندهم بعض التكتيكات الانتخابية أنه ميحبش يحرق نفسه بدري لو رشح نفسه من أول يوم رشح نفسه بيبقى عرضة للضرب والتخبيط والكمائن وحاجات كتير وأي حد يقولك أصبر حد غيري ياخد القلم الأول".
وتابع: "جزء من الحرفنة يقولك أنا مخدش القلم الأول أنا أسيب واحد اتنين يتقدموا وبعدين أنا بعد الدوشة أقوم مقدم ورقي في سكون والدنيا تعدي معايا في كل الأحوال أنا من أكثر السعداء أن في انتخابات لاتحاد الكرة؛ لأن ده ليه معنى واحد أن اتحاد الكرة الحالي هيرحل ودا في حد ذاته نعمل كبيرة وفضل من الله عظيم أن المسؤولين في اتحاد الكرة يغادرون في سلام".
وأوضح: "المهم أن هما يرحلوا كلهم مش حتة منهم كلهم وكل من أسهم في المشكلة لا يجب أن يكون جزء من الحل ودي قاعدة معروفة هات أي حد بتاع إدارة يقولك من كان سببا في المشكلة لا يمكن أن يكون جزء من الحل، الحل أن اللي عمل المشكلة والفوضى وكل حاجة وحشة في منظومة كرة القدم يرحلوا وييجي غيرهم يحاولوا يصلحوا ما أفسدوه".
واختتم: "وأرجو منشوفش حد منهم راجع تاني من خلال مجلس تاني أو قايمة تانية أو فريق تاني والا تبقى مشيت أحمد وجبت الحج أحمد، نتمنى الجمعية العمومية اللي بنتخب تراعي ربنا وتجيب الأكفاء اللي عندهم خبرات إدارية مش رياضية أنا مش عايز لعيبة كورة سابقة ومكسرين الدنيا في الملاعب أنا عايز إدرجية مش لاعيبة".
