مدحت شلبي ينتقد إدارة الزمالك: انتوا بتكتبوا وتعبروا ازاي؟

هاجم الإعلامي مدحت شلبي مجلس إدارة نادي الزمالك بقيادة الكابتن حسين لبيب بعد اشتباك ثلاثة من لاعبي الفريق مع احد المنظمين خلال مواجهة بيراميدز في السوبر المصري المقام في الامارات.

وقال شلبي خلال برنامج "مساء الأنوار" المذاع على قناة "أم بي سي مصر": "ضغوط أيه اللي اتعرض الزمالك ليها؟ تعنت ايه اللي قابله نادي الزمالك؟ يا ناس دا الناس بتعاملكم بمنتهي الترحاب وتنزلكم في أفخم الفنادق انتوا عايزين تضربوا الناس في عقر دارهم ويقولوا متشكرين ياجماعة؟".

وأضاف: "كنت أتصور أن بدل ما ينزل الكلام ده ينزل كلام تاني مختلف خالص، ينزل يتقدم مجلس الإدارة باعتذار رسمي إلى السيد فلان الفلاني والامن الاماراتي وكل من شهد هذه الواقعة المؤسفة من جانبنا ونطلب منكم بما يعني أن خلال الموضوع ينتهي كده دا المعني ولكن انت بتكتب لي تعنت؟ وضغط أي تعنت وأي ضغط انتوا بتكتبوا ازاي وبتعبروا ازاي".

وتابع: "هما دلوقت مازالوا في القسم وادفعت 600 الف درهم غرامة وساهم مجلس أبو ظبي في هذه الغرامة وربما يباتوا النهاردة ويفرج عنهم في النيابة واتصور طالما في قرار غرامة فأتصور أن الامر في طريقه للانتهاء".

وواصل: "أنا عندي تلات رسائل بوجهها للأستاذ حسين لبيب رئيس مجلس إدارة نادي الزمالك حضرتك من أسبوع أو أكتر طلعت وقولت أكبر قلعة رياضية في مصر طيب أكبر قلعة رياضية في مصر مش كان أولى بيها تاخد قرارين الأول اعتذار رسمي والتاني ترحيل اللاعبين للقاهرة وتوقيع أقوى الغرامة عليهم يا أستاذ حسين لبيب يا اكبر قلعة رياضية في مصر".

وأوضح: "يا كابتن حسين لبيب وأنت رجل رياضي هل ينفع أن حضرتك تطلع وتقول إنه لو ده محصلش ومتحلتش أنا هنسحب؟ هل لغة الانسحاب أصبحت اللغة الرسمية لمجلس إدارة الزمالك؟ حضرتك اتخذت قرار بالانسحاب قدام الأهلي دون مبرر وهددت بالانسحاب من السوبر الافريقي ودي التالتة وانت مجلسك مكملش سنة".

وأكمل: "أنت قبل كده انسحب أمام الأهلي في الدوري تحت أربعة شعارات ولم ينفذ منها شيء، معرفش يا كابتن أنت كنت كابتن كبير في كرة اليد هل كنتم متعودين تنسحبوا كل شوية؟".

وذكر: "رئيس النادي بحجم الأهلي والزمالك هو رجل دولة، هل رجل الدولة في دولة بحجم الامارات أو في أي دولة سهل كده يقول هنسحب وتبوظ دورة أشرف عليها مجلس أبو ظبي الرياضي ووفروا لكم كل سبل الراحة ناهيك عن الاستقبال هل هو ده الرد؟".

واختتم: "الامر التالت والأخير والرسالة التالتة حضرتك ملكش سيطرة على اللاعبين اللي بيكتبوا على السوشيال ميديا اللي جرى وضرب الراجل على دماغه منزل ستوري مفيهاش غير صورة كلبش وكاتب شكرا على حسن كرم الضيافة يا اخي إذا لم تستحي فأكتب ما شئت هل يا كابتن حسين حضرتك مسيطر على اللاعيبة؟".